542/2025-2026

Aizawl the 13th March 2026: Chapchar Kut 2026 lawmna pui ber chu vawiin khan Aizawl lammualah hman a ni a, Chief Minister Pu Lalduhoma chu Kut Pa niin Pu C. Lalsawivunga, Art & Culture Minister chu Kut thlengtu a ni a. Larsap Gen. Dr. VK Singh, PVSM, AVSM, YSM chuan a hmunah a telpui bawk. Kumina Chapchar Kut thupui atan "Zo nun ze mawi - Inremna" tih chu hman a ni.

Kumin Chapchar Kut hi hapta khat chhung hman a ni a, March ni 9, Thawntanni khan Kut Tlan hmanga bul tanin, Kut pual Handloom, Textile & Handicraft Exhibition and Food Processing and Food Court te, Flower Show te, Living Museum (Live demonstration of Mizo Typical Life) te, Photo, Painting Exhibition leh Chapchar Kut Film show te hapta khat chhung atana buatsaih zui niin vawiin hian a lawmna pui ber hi buatsaih a ni ta a ni.

Thu sawiin Kut Pa Pu Lalduhoma chuan, khawvel hmun hrang hranga awm zofate Kut chibai a buk a. Hlim taka hmang theuh turin duhsakna a hlan a ni. Chief Minister hian, kan pi leh pute khan Chapchar Kut hi hlim taka hman ngei an tum thin avangin tumah an inhau duh ngai lova, inremna hunah amang thin. Vawiina kan thupui "Zo nun ze mawi - Inremna" hi chapchar Kut nen a inhmeh em em a ni.

Inremna hi kan lal leh an upate pawh khan an ngaihlu a, ro an relna tinrengah "Chalrem" leh "Saui tan" dan hi thiam takin an hmang fo thin. Inremna atana thil pawimawh tak chu a mawhphurtu nih ngamna leh a tul anga thupha chawi ngamna hi a ni a. Kan thiam lohna leh fel lohnateah midang puhmawh lova 'Ka thiam loh a ni e, ka mawh a ni e' tih ngamna hian inremna te, damnate a thlen thin. He kut atang hian mawhphurhna la ngam turin i huaisen thar ang u.

Inremna a awm theih nan social media-a kan thu post leh comment te pawh hi i fimkhur ang u. Politics thila "Lim inhalsak" te hi kan hnamzia a ni lo. Rorelna hmunah tawngkain inkhak bawrh bawrh mah ila kan inhaw zui ngai reng reng lova. Inngeih takin kan inkawm zui leh mai thin. Inremna Kut kan hmang a ni tih hriain vawiin atang hian mi zawng zawngte inrem thar leh ang u, tiin mipuite a sawm a ni.

Kut thlengtu Pu C. Lalsawivunga chuan thuhma a sawi a. Hlim taka hmang turin kal khawmte duhsakna a hlan a. Kut hlawhtling tak buatsaihtute zawng zawng chungah lawmthu a sawi a ni.

Central YMA President Pu R. Lalngheta chuan kal khawmte lawmna thu a sawi a. Hnama min dintu Pathianin kan hnam tana ni ropui min buatsaihsak Chapchar Kut kan thleng leh thei hi a lawmawm a. He kut hi i uar deuh deuh ang u. Kut hlawhtling tak kan hman theih nana thawktute chungah te, Mizoram pawn atanga he hun hmang tura rawn kal zawng zawngte chungah te kan lawm em em a. Kan thupui "Inremna" nunpui a, Mizo hnam ti vul zel turin zofa zawng zawng te ka sawm a ni, a ti.

Chapchar Kutah hian Chief Minister chawimawina Nopui semchhuah a ni a. A dawngtute chu:

1. Esther Hnamte, Lunglei, Artist

2. Lalhmingmawii, Chaltlang, Lemziak thiam, Award tam tak lo dawng tawhtu.

3. Henry Lalhmingmuana, Lawngtlai 3, Rickshaw driver, a passenger-in a motora Rs 17 lakh a theihnghilh chu kim takin a pe leh a ni.

4. Pu VL Bela, Electric Veng, Aizawl Zotheihuan siamtu, kum tam tak chhung nungcha humhalh zirtirtu.

5. John Lalrinchhana Jahau, Khuangleng, Entreprenuer, te an ni.

Nopui dawngtute hi pawisa fai Rs. 1,00,000 leh Citation pek an ni a. Kumin Chapchar Kut hi hetiang chawimawina Nopui pek chhuah tum khatna a ni.

Fai intihsiakna lawmman te, Mizoram Bana Kaih hnuaia CM Special Award te pawh sem a ni a. Central YMA kaihhruaina hnuaiah Cheraw kanpui leh Khuallam entir a ni a. Pipu zai te, lam chi hrang hrang te, Mizo infiamna te, Thingdim lemchan te, Pawnto te entir a ni a. Pang Cultural Troupe ten Thla Koh an entir bakah NEZCC aiawh Meghalaya leh Sikkim Troupe ten an hnam lam an entir bawk.