2327/2025-2026

Aizawl; the 21st November,2025: Vawiin khan DC confernce Hall-ah Pu Zoramsiama Hmar, Addl.DC kaihruaina hnuaiah Depositors Education and Awareness  Fund(DEAF)   chungchanga inhrilhhriatna hun buatsaih.

Tunhma chuan eng emaw avanga Bank Account kum 10 chuang khawih chet tawh loh hi, Account thi kan ti mai thin a. Chuta pawisa awm te chu  RBI DEAF account-ah a lut thin a, chuta pawisa tling khawm chu  RBI in financial literacy campaign leh mipui te hnena   bank lam thil pawimawh inhrilhhriatna (awareness campaign)  tur atan te in hman thin a ni.  Tunah erawh chuan sawrkar laipuiin account neitu customer te hnenah ngei an pawisa hi a bo a bang awmlova a luh theih nan dan a siam thar ta a. Bank Account  kum 10 chuang te khawih chet tawh loh,(Account thi tawh emaw kan tih thin)  a pawisa awm te  chu a lakchhuah thei ta ni.

Hemi chungchang inhrialhhriat nan hian SBI Lead Bank chuan  1st October,2025 atang khan Awareness Campaign hi an lo kalpui tawh a, 31^st Decemeber,2025  thleng an kalpui dawn a ni. Vawiin hi Aizawl district pualin Awareness campaign buatsaih a ni.

Pi Lalramchhani Ralte, Lead District Manager, Aizawl district chuan Aizawl district chhunga Bank hrang hranga  DEAF Account a pawisa tling khawm hi 9.25 crore a awm mek thu a tarlang. Aizawl district chhungah hian kum 10 chuang   Account khawih che tawh lo leh ngaihsak tawh loh mi engemaw zat an awm a. A then phei chu an account-a  nuai chuang nei an awm nual thu a sawilang bawk.

Vawiin programme-ah hian DEAF Account atangin mi 3 hnenah Account Activate tawhsa, pawisa lakchhuah thei na mai tur hlan nghal an ni. Account kum 10 chuang khawih chet tawh loh nei te chuan  an Account neihna Bank-ah Document pawimawh te kenga kal mai tur a ni.

Pu T.Lhungdim,GM &OIC  RBI, Aizawl  chuan Banker te chu customer te khawngaihna leh duhsakna rilru nena thawk a, Customer te hnena malsawmna thlentu nih tum turin an chah a.  DEAF Account atanga pawisa la chhuak customer te zingah, damlo pawisa inenkawlna mamawh tak an tel tih a hriat te chuan a ti lawm hle thu a sawichhuak bawk.

Meeting Chairman Pu Zoramsiama, Addl DC pawhin Banker te chu DEAF Account an enkawl dan sawrkar chuan a thlir reng dawn a, DEAF Account a pawisa awmte chu a neitu dik tak  kuta a thlen theih nan thahnem ngai taka bawhzui nghal char char turin a ngen bawk.

Pi Lanisai, Asst.Commissioner chuan lawmthu sawiin vawiin programme hi a khar ta a ni.