2328/2025-2026

Lunglei, 2025 Sahmulphah thla ni 21: India ram Deputy Prime Minister hmasa ber, "Iron Man of India", Sardar Vallabhbhai Patel piancham vawi 150-na puala Mera Yuva Bharat (MY Bharat) hnuaia India ram inpumkhatna atana beihpui thlak mekah tukin khan Lungleiah Inpumkhatna Kawng Zawh (Unity March) buatsaih a ni.

Government High School Lunglei tuala Unity March ṭanna inkhawmah Khuallian, Lunglei Municipal Council (LMC) Chairman Pu Lalzuithanga chuan Sardar@150-in a tum chu ṭhangtharte zingah inpumkhatna leh ram hmangaihna thinlung tuh bakah, ram mipuite'n Sardar Vallabhbhai Patel zahna kan lantir nan a ni, a ti a. Hemi puala Ministry of Youth Affairs-in ṭhalaite tana intihsiakna hrang hrang a buatsaih thu sawiin, hnam nun chawi san nan te, inpumkhatna, faina leh kawng hrang hranga hma sawnna atana inzirtirna remchang atan Unity March chu buatsaih a nih thu a sawi a. Sardar Patel-a'n ram bung hrang hrangte inpumkhatna tura theih tawp a chhuah ṭhin angin ṭhangtharte'n ram leh hnam hmangaihna rilru pu thar a, inpumkhatna kawnga theih tawp chhuah tlang turin a chah a. Unity March kawng zawh turte a vai liam nghal bawk.

Lunglei Additional Deputy Commissioner Pi Zoramdini chuan kaihruaiin, hun hman chhan leh Sardar Vallabhbhai Patel chanchin leh a hma lakna avanga India ramin inpumkhatna leh hmasawnna a neih dan te a sawi a. Kal khawmte'n India ram inpumkhatna atana theih tawp chhuah tur leh ruihhlo laka fihlim turin thutiam an sawi rual a. Lunglei Sub-Headquarters YMA Cultural Troupe te'n hnam lam an entir bawk.

Unity March-ah hian sikul zirlaite, NCC, Scouts & Guides leh NSS te, YMA, MHIP leh MJA te, sawrkar official leh khawtlanga mi challang tak takte an tel a. Traffic Incharge Pu Lalṭhabuanga kaihhruaiin Lunglei Chanmaria Govt High School Lunglei aṭangin Lunglei Venglaia Old Tennis Court thleng kawng zawhin, kawng dunga bawlhhlawh an chhar fai nghal a. Old Tennis Court-ah Pu Lalramsanga Colney (Sports & Youth Services Department) kaihhruaiin tawpna hun hman a ni a. Lunglei Sub-Headquarters YMA Cultural Troupe te'n hnam lam entirin, Unity March-a telte hnenah certificate hlan a ni a. Lunglei Sub-Headquarters YMA President Pu K. Lalfakzuala'n lawm thu sawiin hun a khar.