2325/2025-2026

Aizawl; the 21st November, 2025: Tukin zing khan  India ram Deputy Prime Minister leh Home Minister hmasaber, freedom fighter ropui, 'the Iron man of India' tih hial a an sawi thin, Sardar Vallabhbhai Patel piancham kum 150 lawmna puala inpumkhatna kawngzawh( Sardar @150 Unity March) chu Higher Secondary School pariat(8)-a National Sevice Scheme(NSS) Volunteer te, Mizoram Police te leh Sawrkar hnathawk ten Sikulpuikawn leh Chanmari atangin Lammual thlengin an zawh a.Lammual-ah Education Minister Dr.Vanlalthlana hovin kawngzawh kharna  programme hman zui nghal a ni.

Sikulpuikawn atanga Lammual inkar inpumkhatna kawngzawh hi Pu Zoramsiama Hmar,Addl.DC in a hova, Chanmari atanga Lammual inkar kawng zawh hi Pu Vanlalrova,Addl.DC in aho ve thung a ni. Sikulpuikawn leh Chanmari-ah hian PuZoramsiama leh Pu Vanlalrova te hian Sardar Vallabhbhai Patel chanchin sawiin,  India khua  leh tui tha ni tura zirlai naupang te  mawhphurh tarlangin, India ram inpumkhatna chawinungtu ni tum theuh turin zirlai naupang te hnehah fuihna thuchah an sawi.

Lammuala Sardar@150 Unity  March kharna inkhawmah thu sawiin, Khuallian Dr.Vanlalthlana chuan  Sardar Vallabhbhai Patel piancham vawi 150  kan lawm mek lai hian, India ram inpumkhat nana Sardar Vallabhbhai Patel  contribution ropui tak te,  a tumruhna,huaisenna  leh a ram hmangaihna  thinlung te kha hre reng i la, India ram inpumkhatna tichhetu leh  tihbawrhbangtu ni lova, a chawinungtu kan ni ve theuh theih nan i inhlan thar leh theuh ang u, tiin kawngzawhtu kalkhawm te chu a sawm a ni.

Lammuala Sardar @150 Unity March, closing function hi Aizawl DC Er.Lalhriatpuia'n a kaihruaiin, Pu Srinivas Sidi IAS, SDO in kawngzawhtu kalkhawm te hnenah Inpumkhatna Thutiam(Unity Pledge) a lak tir a. Dingdi Cultural  Club ten Cheraw kan an entir.

Pu Vanlalrova'n lawmthu sawiin,  tukin zing Sardar@150 Unity March kawngzawh  Programme hi  a khar ta a ni.