2324/2025-2026

Dated Aizawl, the 20th November 2025: Vawiin khan Urban Development & Poverty Alleviation Department huaihawtin, Ministry of Housing & Urban Affairs, Government of India atanga Mizoram-in ‘Special Award for Efficient Traffic Management System’ a dawn chu, a lawmna hun, Aijal Club-ah hman a ni a. UD&PA Department changtu Minister Pu K. Sapdanga leh Transport Department changtu Minister Pu Vanlalhlana ten he hun hi hmanpuiin, Pu Khilli Ram Meena, Chief Secretary, Govt. of Mizoram bakah sawrkar mi pawimawh thahnem tak an tel a, UD&PA Secretary Pu Lalmalsawma Pachuau-in lawmna inkhawm hi a kaihruai a ni.

Transport Minister Pu Vanlalhlana chuan thu sawiin, Mizoramin he lawmman a dawn theih chhan chu, department hrang hrang, a bikin - Police (traffic), Transport leh UD&PA te inkara thawh hona a that vang a nih thu sawiin, ‘traffic management committee-te leh ni tina, a taka thawktu ten chawimawi an phu a ni’ a ti a; chutih rualin he lawmman dawn a nih theihna chhan bul ber chu ‘mipuite an ni’ tiin, pi leh pute hnen atanga kan chhawm, zo nun ze mawi - hawihhawmna te, thu awihna te, dawhtheihna te leh lirthei khalhtute awm dan mawi takte avanga he lawmman hi dawng kan ni a ti a; heng kan zo nun ze mawi takte hi chhawm nung zel turin mipuite a sawm bawk a ni.

UD&PA Minister Pu K. Sapdanga pawhin thu sawiin, ‘he award hi mipui award liau liau a ni’ a ti a; hun remchang awm thei phei se chuan zau zawka a lawmna hun buatsaih hial a phu thu sawiin, Mipui Award a ni tih lantir nan leh mipuite hnena lawmthu sawi nan, naktukah hian City bus-a chuang thin zawng zawngte tan Bus Fare, a chanve chauh lak a nih tur thu leh Aizawl Traffic Police duty zawng zawngte chu chawchhun pek vek an nih tur thu a puang a ni.

Vawiina Mizoramin lawmman a dawn lawmnaah hian, Pu RL Zidinga, Chief Town Planner, UD&PA Department hnen atangin report ngaihthlak a ni a; Pu C. Vanlalvena, MPS Superintendent of Police leh Pu Khilli Ram Meena, Chief Secretary, Govt. of Mizoram ten thu an sawi bawk a. He lawmman dawn a nih theih nana mawhphurhna pawimawh tak tak chelhtu – Transport, Police, UD&PA, AMC leh Aizawl Smart City Ltd., hotute bakah sawrkar mi pawimawh thahnem tak he hunah hian an tel a; Pu Jacob Lalawmpuia, Director, UD&PA Department chuan lawmthu sawiin hun hi a khar a ni.

Special award for Best Traffic Management System chungchang:

Institute of Urban Transport (India) buatsaih, 18th Urban Mobility India Conference and Expo chu November 7-9, 2025 khan Gurugram-ah neih a ni a. Hetah hian lawmman hrang hrang sem zingah Mizoram Sawrkar chu Traffic Management ah Special Award hlan a ni.

UMI-ah hian Award Category hrang hrang siam ṭhin niin heng Award dawng tur thlang tur hian Award Selection Committee an ṭhu ṭhin a. Heng Selection Committee atana mi ruatte hi Urban Transportation chungchanga mi thiam takte an ni ṭhin. Tun tumah hian Ms. D. Thara, Additional Secretary, Ministry of Housing & Urban Affairs, Government of India chu Award Selection Committee-ah Chairperson a ni nghe nghe. 

18th Urban Mobility India Conference and Expo-a Award dawng thei tur hi category 8 lai an awm a, chungte chu:

1.    City with Best Public Transport System.

2.    City with Best Non-Motorized Transport.

3.    City with most Innovative Financing.

4.    City with Best Green Transport Initials.

5.    Metro Rail with Best Multimodal Integrity.

6.    Metro Rail with Best Passenger Services.

7.    Running Trophy for State/UT which has Implemented Best Urban Transport Project in the previous year.

8.    Special award for Best Traffic Management System.

Heng zingah hian Special Award Category hi telh hnuhnawh niin Category dang ang lo takin Mizoram tan elpui tur an awm lo a; Mizoramin Traffic Management System felfai tak a neih chuan Award Selection Committee-te beng thlengin, he special recognition, Special Award hi hlan a lo ni ta a ni.