3465/2022-2023

Aizawl, 2nd February, 2023 : – Vawiin khan National Disaster Management Authority (NDMA) leh Aizawl District Disaster Management Authority (ADDMA) buatsaihin Aizawl khawpuiah lirnghing a thlen thulha chet lak leh chhanchhuahna hna thawh dan tur enchhinna Earthquake Mock Drill neih a ni.

He Mock Drill atan hian National Disaster Response Force (NDRF) 1st Battalion, Guwahati atangin an rawn tel a, Assam rifles leh Central YMA bakah Local Council thenkhatte an tel bawk a ni.

Chawhma dar 10:00 ah lirnghing hi 8.7 richter scale a na a thawk anga tan niin lirnghinna hmun (epicentre) hi Champhai atanga intan anga ruahman a ni, Aizawl bawrhsap pisa-a District Emergency Operation Centre (DEOC) ah Incident Response Team member te an tlan khawm nghal a. Aizawl District Emergency Operation Centre (DEOC)-ah lir a nghin thu hriat a nih veleh ralkhel dar (siren) tihrik a ni a. DEOC atang hian Aizawl DDMA Chairman Aizawl bawrhsap Dr Lalhriatzuali Ralte hovin chhiatrupna thlen thulha mawhphurtu hrang hrang - National Disaster Response Force (NDRF), State Disaster Response Force (SDRF), Assam Rifles, Mizoram Police, Fire & Emergency Services, H&FW, MPRO, Quick Response Team, Traffic Police, PHE, Power & Electricity Department, LC leh YMA ah te chhiatna thlenna hmun leh thlen dan rang takin hriattir an ni a. Chhanchhuaktu pawl (emergency/quick response team) te tirh chhuahna hmunpui (staging area) atan MINECO open gym bul tualzawl chu hman a ni.

Govt. JL HSS, New Market Building, Tuikual North lung tohlawt bul, RD Directorate leh Civil Hospital casualty-te chu lirnghing avanga hliam tuarte chhanchhuah hna leh nunna chante lakchhuah hna thawhna hmun atan hman niin, Civil Hospital Aizawl leh Agape Hospital, Chanmari te chu emergency makeshift hospital atan hman a ni a, Lirnghing vanga chhiatna chi hrang hrang thleng thei kangmei, leimin, in chim etc., atanga chhanchhuah ngaite chhanchhuah dan tur chu mawhphurhtu chi hrang hrang ruatten a tak ang thei ber turin hna an thawk chhin a ni.

Aizawl DDMA Chairman, MPRO team Incident Response System (IRS) hnuaia mawhphurtu dangten DEOC hi an thutchilh a. Incident Commander ruatsa ten chhiatna thlen dan te, thi leh hliam tuar zat te leh a tul apiang a khat tawkin an rawn hriattir reng a ni. In biakpawhna chi hrang hrang internet, mobile tower etc., a hman theih loh avang leh power supply a awm loh avangin mipuite hnena thlamuanna thu leh chanchin tharlam hrilh hriat theihna awm chhun All India Radio kaltlangin darkar khat danah chanchin update thin a ni bawk.

Mock Drill neih zawh hnu hian Aizawl District Emergency Operation Centre-ah ah thlirletna (debriefing) neih chhunzawm a ni a, Incident Commander leh Observer ten report pein hmasawnna leh tan lak ngaihna laite sawiho a ni.