3466/2022-2023

Aizawl 2nd February 2023: Mizoram State Disaster Management Authority (SDMA) leh National Disaster Management Authority (NDMA) tang dun chuan vawiin khan ‘STATE LEVEL MOCK EXERCISE ON EARTHQUAKE DISASTER’ a huaihawt a. Hemi atân hian ‘Orientation and Coordination Conference (virtual)’ chu ni 23.01.2023-ah neih a ni a. Table Top Exercise ni 31.01.2023-ah neih a ni tawh bawk. Vawiin hian Aizawl khawpui hmun thlan bikah Mock Exercise neih niin, District headquarters-ah pawh hmun thlan bîkah te ‘Mock Exercise on Earthquake’ hi neih a ni. 

‘Mock Exercise on Earthquake’-ah hian lirnghing lo thlen palh thulha hmalak dan tur chi hrang hrang entirin leh zirho a ni a. Table top Exercise-ah hian Disaster lama mithiam lokal Brg. B.S Thakar chuan department hrang hrang atanga lokalte hnênah lirnghing avanga chhiatna lo thlen thulha hmalâk dân tùr Assembly Secretariat-ah zirtîrin, DDMA/DC -ten virtual conference kaltlangin mock exercise hi an lo zâwm bawk a ni. He hun hmanpui tur hian NDMA atangin Lt Gen. (Retd) Syed Ata Hasnain, Member NDMA, Brig. B.S Thakar (Retd.), Consultant (Mock Exercise and Incident Response System) leh Colonel (Retd.) Nadeem Arshad, Consultant (Operation), NDMA te an lokal a ni. 

Vawiin hian State Level Mock Exercise on Earthquake Disaster ah hian District headquarters tinah hmun thlan bîk neiin lirnghing lo thlen thulha hmalak dân tùr a taka entîr a ni a, mithiam lokal te leh mithiam sâwm bîk ten he Mock exercise hi an endik a ni.

Mock Exercise kharna Conference Hall, Assembly Secretariat Annexe-a neih ah DM&R Minister Pu Lalchamliana chuan thu sawiin hlawhtling taka mock drill neih a ni chu lawmawm a tih thu a sawi a, chutih rualin hmasawnna tur leh tan lakna tur tam tak an zirchhuak nia a hriat thu sawiin hengahte hian hma kan lak chhunzawm char char a ngai a ni.

Minister chuan mipuite leh officialte bakah chhiatrupna a lo thlen huna hna chanvo nei zawng zawng ten chet an lak dan tur leh an mawhphurhnate an hriatchian phah lehzual a ngai tih sawiin, inzirtirna kalpui thin mah ila a taka chhiatna a rawn thlen leh si loh hian inthlahdah a awl thin a, chuvangin chawl lova zirtirna hi kalpui reng a tul tih a sawi bawk.

Minister hian NDMA atanga mi pawimawh tak tak lokal te leh, District tin atanga thahnem ngai taka he Mock Exercise lo huaihawttu zawng zawng te leh Force leh department hrang hrang leh NGO te, he mock exercise hlawhtlin nâna tha leh zung sêngtu zawng zawng chungah lâwmthu a sawi a. Mizoram hi lirnghing thlen hlauhawmna zone-a awm kan nih hriaa kawng tinrênga lo inpuah chah tùrin zoram mipuite a ngen a ni. Pi K.Lalrinzuali, Secretary, DM&R Department chuan lâwmthu a sawi bawk

SDMA chuan hlawhtling taka ‘STATE LEVEL MOCK EXERCISE ON EARTHQUAKE DISASTER’ huaihawt anih vangin lawmthu a sawi a. He mock exercise hlawhtlin nana hun leh tha hlu tak sêngtu zawng zawngte chungah lawmthu a sawi a ni.