3467/2022-2023

Aizawl, 2.2.2023: Vawiin chawhnu khan NABARD (National Bank for Agriculture and Rural Development) chuan Aijal Club-ah State Credit Seminar a buatsaih a. He hun hi Chief Minister Pu Zoramthanga chuan khuallian niin a hmanpui.

Chief Minister chuan State Focus paper - 2023-24 chu a tlangzarh a. NABARD in state hmasawnna atana hma an lo lak tawhte chu lawmawm a ti a. Thu sawiin, state in chak zawk leh rualkhai taka hma a sawn theih nan bank te an pawimawh thu a sawi. State dangte khaikhin chuan Mizoram chu la naupang tak, hmasawnna kawngah pawh puihna tam tak mamawh a nih thu a sawi a. State dangin leilung hausakna an neih ang neih ve vek lo mah ila Mizoram chuan potential haichhuah tur tam tak a nei thung a, chu potential haichhuak tur chuan kan ngaihtuahna her danglam a tul thu a sawi a. Hmalakna tam zawk chu a lian emaw, a te emaw bultanna tur sum lu mamawh a nih thin avangin bank te'n mi tam zawk hnenah loan an pekchhuah zel a, Financial Literacy inzirtirna neih belh zel te, Mizoram hmun hrang hrangah zau zawka an inzarpharh zel te a pawimawh thu a sawi a.

Chief Secretary Dr. Renu Sharma pawhin NABARD chu state economy hmasawnna a thawhah sawrkar tan thawhpui tha tak a lo nih thin dan te sawiin, agriculture leh horticulture mai bakah lei nghenga eizawnnain hma a sawn theih nan hmalaknate chu fakawm a ti a. Awlsam zawka loan pekchhuah a nih theih nan leh credit system tha zawk a awm theih nan te hmasawnna tur tam tak a awm thu a sawi bawk.

Seminar-ah hian Pu KVSSLV Prasada Rao, General Manager/OIC, NABARD Mizoram RO, Aizawl chuan kalkhawmte lawmna thu sawiin, Mizoram Rural Bank Chairman Pu V. Jaya Chandra chuan thu sawi bawkin, Tribal Development Fund, Rural Haat leh SHJ/JLG sanction letter pekchhuah a ni bawk a. Heng sanction letter hi Chief Minister in a hlan a ni.

Pu Thangchinkhup, DGM leh Pu Rahul Kumbang, AM, NABARD chuan State Focus Paper resentation pe in, DGM Pu Gautam Barman chuan lawmthu sawiin hun a khar a ni.