Vawiin chawhma khan Art and Culture Department leh Mizo Poetry Society tangkawp chuan Mizoram State Archives Hall ah World Poetry Day pualin program an buatsaih a. Art & Culture Secretary Pi Thanhliri Pachuau chu Khuallian niin, Prof. R. L Thanmawia, President, Mizo Poetry Society chuan program a kaihruai a ni.
Khuallian chuan thusawiin World Poetry Day chu UNO peng pawimawh tak pakhat UNESCO in a ruat a nih thu leh khawvel ram hrang hrang a chengte in unauna tha zawk a awm theih nan te, hnamdangte nen a inpawhna a lo that zawk nan te, thing leh mau humhalh kawnga harh thar nan te, kan tawng a boral mai loh nan a hmalak nan leh hla phuahtute pawimawhna midangte hrilh hriatna hun atan a hman a nih thu a sawi. Khuallian hian thu a sawi zawh hian Zaikungthar 2 lehkhabu a tlangzarh nghal a ni.
Prof. RL Thanmawia chuan Mizo Poetry Society din a nih chhan leh UNESCO ruahmanna anga World Poetry Day hman a nih chhan te a sawi a. Pu H. Laldinmawia, Secretary chuan report pe in Mizo Poetry Association chu 20th February 2016 a din a nih thu leh member 200 chuang an awm mek thu bakah Mizo Poetry Society-in kum kalta lam a an hmalakna tlangpui a sawi. Ms. Lalhlimpuii, Editor chuan Zaikungpui Thar 2 lehkhabu thlirlawkna hun a hmang bawk.
