818/2022-2023
Champhai, the 8th June, 2022: India ramin zalenna a hmuh Independence Day kum 75-na lawmna, Azadi Ka Amrit Mahotsav pualin India ramah June ni 6 atanga ni 11, 2022 chhung hian Sawrkar laipuia Ministry of Finance leh Ministry of Corporate Affairs kaltlangin Iconic Week hman mek a ni a, Champhaiah pawh AKAM Iconic Week pual hian vawiin khan Bank kaihhnawih inzirtirna Lead Bank Office leh NABARD Champhai buatsaihin Kahrawt YMA Hall-ah neih a ni. He hun hi District Bawrhsap Pu James Lalrinchhana chuan khuallian niin a hmanpui a ni.

Pu James Lalrinchhana chuan Azadi Ka Amrit Mahotsav lawmna kalzela Bank chungchang inzirtirna buatsaih a ni chu lawmawm tiin, AKAM hnuaiah Department hrang hrang ten hma an lak mek zel thu a sawi a. Hmasawna hlawhtlinna chang turin inrelbawlna felfai tak neih hmasak a ngai a, thawhho thiamna leh tumruhna neih a ngai bawk a ni, a ti a. Khawtlang than leh hmasawn nan banking a pawimawh thu leh bank dawr dan zira tuichilh a ngaih thu sawiin, bank hman dan kan zir thiam a ngai a, tangkai leh hlawk zawka hman a nih theih nan sum dahkhawla peipun kan zir thar a ngai a ni, a ti.

Bawrhsap chuan mipui leh bank-te chu inchhawrtawn tur kan nih laia inkarhlatna lian tak kan la nei chu veiawm tiin, indawrtawna inpawh taka inkawmngeih tur kan ni, a ti a. Mipuite chu bank chhawr tangkai thiam tura fuihin, sum leh pai chetvelna reng renga pawimawh tak bank pawha lenchih tur leh hamthatna awmte zawt fo thin turin a chah a, an niin kawng an lo kawhhmuh dawn che u a ni, a ti. Kalkhawmte chu thawhchhuah angte hlawk zawk leh tha zawka hman a nih theih nan sum khawl nachang hre tur leh sum lakluh leh hmanchhuah dante hrechiang turin a chah a. Bank thawktute pawh dawrtute tana dawr nuam, pawisa dawn mai bakah loan pekchhuah kawnga tanla turin a fuih a. Bank chungchang inhrilhhriatna Financial Literacy Camp tam zawk neih tum turin a chah nghal bawk.

Thusawitu dang Pu F. Lalrinmuana, President, Sub-Hqrs. YMA (SYMA) Champhai chuan loan tha tak tak rulh that lohin midang tan kawng a tiharsa thin chu veiawm tiin, sawrkar scheme hrang hrang duan chhawr tangkai theiha awmte hmelhriat a that thu a sawi a. Bank thawktute chu mipui vantlang hriat loh hote te anga langte pawh inhawng taka hrilhhre zel turin a sawm a ni.

He hun hi Pi H.Lalhmachhuani, District Development Manager (DDM), National Bank for Agriculture and Rural Development (NABARD) Champhai chuan kaihruaiin, Pu Jyoti Munna Soren, Lead District Manager (LDM) chuan kalkhawmte lawmna thu a sawi a. DDM NABARD in lawmthu sawiin hun a khar a ni.

He hunah hian bank kaihhnawih hriattur pawimawh hrang hrangte, NABARD chungchang, scheme chi hrang hrang, digital transaction, loan lak theihte leh social security scheme-te sawifiah a ni a. Bank kalphung inhrilhhriatna Financial Literacy Camp (FLC) buatsaih a ni nghal bawk a. District Bawrhsapin bank hnathawk tha mi 8 te hnenah chawimawina thuziak cheimawi a hlan a. IDBI Bank, MRB Champhai, HDFC Bank, AXIS Bank leh Apex Bank hnuaia PMEGP, Mudra, KCC, SHG loan, JLG loan, Business loan, Fisheries loan leh Housing loan hamthatna diltu mi 13 te hnenah an loan dil belhkhawn cheng nuai 50 vel lak phalsakna lehkha sanction letter Bawrhsapin a hlan nghal bawk.

Social Security Scheme Jan Suraksha Scheme peng hrang hrang; PMJJBY, PMSBY leh APY hnuaiah hamthatna dawng thei tur mi 4 inziaklut tharte hnenah receipt hlan a ni a. Iconic Week chhung hian hmeichhiate chawikan nan SHG tan Credit Linkage Program buatsaih, Financial Literacy Camp huaihawt, Jan Suraksha Scheme hnuaia inziahluh chungchang leh tul dangte inzirtirna neih tum a ni.