817/2022-2023
Aizawl the 8th June, 2022 :Vawiin khan Agriculture Minister Pu C. Lalrinsanga chuan State Agricultural Management and Extension Training Institute(SAMETI) Conference hall-ah Agri-clinics and Agri-business Centers (AB & ABC) Scheme chungchang a ni 45 awh tur training a hawng.

Minister Pu C. Lalrinsanga chuan thu sawiin thalai lehkhathiam training tura lo pen chhuak te chungah lawmthu a sawi a, ni 45 training tur a nih angin zuih ral lo turin a chah a, Mizoram hmel ti danglam theitute an ni tih hre rengin hmarchhak state zingah SAMETI, Mizoram chu training buatsaih thei awm chhun an ni tih a sawi a. Minister chuan thalaite zingah intodelh pawimawh zia hretu an pung zel a, chu chuan kan ram economy chawisang kawngah hmasawnin min siam ngei ang a ti a. Vawiin training a lokal te chu midangte eizawnna siamsak tu leh farmers te thlengphak thiamna leh finna zir chhuak ngei turin duhsakna a hlan a. Ram dinchhuah nan incheina mawi ber chu thawhrimna hi a ni tiin a sawi a. Thiamna chu eizawnna a chantir leh pawisa a chantir chu he scheme in a tum pakhat a nih angin vawiin a bul tan hian rah tha chhuah sela, hmathlir thui tak neiin, kal hlawk theih ang bera training chu hmang turin a ngen a ni.

Training hi SAMETI, Mizoram leh National Institute of Agriculture Extension Management(MANAGE), Hyderabad tangkawpin an buatsaih a ni a. Training in a tum ber chu lehkhathiam ten agricultural sector-ah eizawnna an neih nana hmalak a nih bakah loneitu te thleng phak thiamna an pek chhuah theih hi a ni a. A theme hi 'Better farming by every farmer' tih a ni a, trainee mi 23 te hian Agriculture and Allied Subjects, Environmental Science, Botany, Zoology, Chemistry subjects leh MSc degree nei an ni a, he scheme training hnuaiah hian Project indicatives 32 a awm bawk a ni. Training hi Domain pali - Self Transformation Curriculum, Technical Skills, Entrepreneurship and Management Skills, Extension strategies for Agri-entrepreneurship ah then a ni a, core faculty ten an expert subject te an zirtir bakah hmun dang atangin resource person te sawm an ni bawk a ni.