816/2022-2023
Aizawl the 8th June, 2022 : Vawiin khan I&PR Minister Pu Lalruatkima chuan Hermon School zirlai titha te chawimawina programme, Aizawl Vanapa Hall a neih chu khuallian niin a hmanpui. Pu Lalrinsanga Ralte, Serlui bialtu MLA chu khual zahawm a ni.

Hermon School hlawhtlinna lawmpuiin Minister chuan zirlaite, zirtirtute leh nu leh pa te thawhrim rah a ni, a ti a. Khawvel thiamna leh finna sang zelah a thiam thiam leh a thei thei din channa hmuna rawn chuang chhuak mek zirlai pass thar te chu taimakna leh tumruhna nen hmalam pan turin a fuih a ni. Zirlaite chu an tumah chiang tur leh chhawrtlak thiamna paw chhuak ngei turin Minister chuan a fuih a. Nu leh pate thu awih a, chhungkaw tana chhenfakawm, ram tana “fa hrin man hla” nih tum turin a chah a ni. Pu Lalruatkima chuan Central Service ah Mizo inziak tling zo kan awm ta meuh lo chu pawi a tih thu sawiin, zirlai te chu tumruhna neia mahni state chauh ni lo state dang thlenga rorel phaa awm a tul tak zet a ti a. State thenawmah te chuan Central Service leh Central Sawrkara office pawimawhah kum tin an lut a, nakin lawkah kan state ngeiah pawh sawrkar office ah hotulian nihna an la rawn chelh fur thei dawn a. Hnam ang pawhin tanlak a tul tak zet, Pu Lalruatkima chuan a ti.

Pu Lalruatkima chuan zirlaite leh thalaite, Pathian leh kan ram tan tia hmalam hunah eng pawh ti se, thahnemngaihna leh rinawmna nen nung chho zel turin a chah a. Zirlai hlawhtlingte an kal zelna turah duhsakna hlanin hlawhtlinna chang zo ta lo te pawh an tan hun tha a la inher chhuak dawn, tih leh, an hmaa awmte lehpel thei tur khawpin hun tha an la nei tih hriaa, theihtawp chhuah turin a fuih a ni.

Pu Lalrinsanga Ralte pawhin zirlai leh zirtirtute lawmpuiin Pathian rawngbawlna tak tak anga ngaia hna an thawh avangin hlawhtlinna ropui tak an chang tiin Principal, zirtirtute leh staff zawng zawng te a fak a. Thahnemngai taka zirlaite tana inpe zirtirtute hlawh chu nakinah an naupangten an la chawimawi let ve leh thung hi a ni, a ti. Pass thar, a bik takin pawl sawmpahnih zirchhuak ten uniform ha tawh lovin college an kal tawh dawn a, an nun an fimkhur lehzual a ngai tih hre turin MLA chuan a chah a. Hlawhtling tur chuan mahni inthunun theih, tumruhna leh inpekna a pawimawh a ni, a ti bawk.

Hermon School hian kumin HSLC result chhuakah distinction ah mi 3 leh a pumpuia palina dinhmun hauh pha Lalkrawshlui an nei a. Lalkrawshlui hian science ah zaah za hmuin subject topper a ni bawk. HSSLC result chhuakah distinction ah mi 3 an inhlangkai a, Political Science subject topper Lalrinmawii chuan za zelah 96 a hmu pha a ni. HSLC exam-ah hian an zirlai 54 zinga 53 in an pass a. HSSLC ah hian an school zirlai zawng zawng an pass vek a ni.