Vawiin khan School Education Conference Hall-ah All District Project Coordinator’s meeting chu School Education Minister Pu H.Rohluna leh Parliamentary Secretary Pu Joseph Lalhimpuia hova neih a ni.
Pu H.Rohluna chuan Department lian leh thawktu tamna ber School Education Department hnuaia thawktute chu an thawhna department pawimawhzia an hriat thar a tul tih sawiin hna an lo thawh tawh leh hma an lo lak tawhna ah lawmthu a sawi. SSA chu School Education Department kut ke pawimawh tak a nih avangin kawng hrang hrangah thawhhona tha an neih zel a pawimawh a, a bik takin record vawn kawngah an tan leh zual a ngai a ni, a ti a. District lama thawktute chu tun aia tang lehzual tura chahin ram thatna tur a nih dawn phawt chuan thawktu thlak pawh an hre loh tur thu leh huai taka kal zel an tum thu Minister hian a sawi a. A hmanna tur dik taka sum hmante, hunbi neia thehluh ngai chi a hun dik taka thehluhte leh mahni chanpuala hnathawh tur reng reng tha taka hlenchhuak zel tura sawmin rawtna an neih apiang sawichhuak hrehlo turin meeting a tel te a sawm a ni.
Pu Joseph Lalhimpuia chuan State level leh District level-a thawktute in rawn tlang thiam a, an thawhho that chuan hna pawhin hma a sawn chak hle ang, a ti a. Tunlai thiamna hmangin zirtirtu, school naupang leh school awm zat te awlsam taka hriat zung zung theihna school mapping changtlung tak buatsaih tum mek a nih thu meeting-ah hian a sawi lang bawk.
Meeting thawh khatna hi School Eduction Secretary leh Director ni bawk Pu R.Lalvena’n a kaihruai a, District hrang hrang atangin hma an lak tawhna leh harsatna an neih te ngaihthlak niin sawihona neih zui a ni bawk. Thawh hnihna chu Pu V.Lalsiamthara, Additional State Project Director, Mizoram SSA in a kaihruai a, State Project Director Mizoram SSA Pu Lalhmachhuana’n thu a sawi.
Mizoram SSA Mission in kum 2014-15 chhunga SSA sum ruahmanna siam Annual Work Plan & Budget 2014-15 atangin sorkar laipui chuan cheng nuai 19,237.25 a pawm thu tarlan a ni bawk.
He meeting-ah hian State Project Office atangin officer te, Intervention Coordinator te leh District atangin District Project Coordinator, Deputy District Project Coordinator te an tel a ni.
