Green Mizoram Day chu Mamitah uar taka hman a ni a, DLAO Conference Hall-ah a hawnna inkhawm buatsaih niin, Pu K. Lalthawmmawia, District Bawrhsap leh District Level Green Mizoram Committee Chairman ni bawk chu khuallian a ni.
Khuallian chuan Green Mizoram Day chu a huhova Mizoram ramngaw kan humhalh theih nana buatsaih a ni a, hemi kawnga ke kan pen chhuah zel hi a pawimawh em em a ni, a ti a. Thingtiak phuna, ramngaw siambelh zel hi kan tih makmawh a nih rualin, a awmsa humhalh pawh kan mawhphurhna a ni a, hemi ni hi ramngaw humhalh pawimawh zia min hriatchian tirtu ni se a duh thu a sawi a. Ramngaw ti chhetu langsar zual tlangram lo neih bansanna tura sorkar hmalakna NLUP kalpui mek chu a hlawhtlin ngei theih nan tanpuina dawngtu te mai bakah a dawnglo te pawhin sorkar kan tawiawm a ngai a ni, a ti bawk.
Pu Lallianzuala DFO, Member Secretary, District Level Green Mizoram Committee chuan Mamit District huam chhunga hmalak dan leh hmathlir te a sawiin, Green Mizoram Day pualin thing tiak 49,810 phun a ni tawh thu a tarlang a. Kumina ram kang veng tha ber district lawmman sorkarin a buatsaihah Mamit District chuan lawmman pakhatna certificate leh tangkafai Rs, 50,000/- keng tel a dawng tih a tarlang bawk.
Green Mizoram Day 2014 pual hian district huam chhunga ram kang tur ven that kawnga tha thawh tha khua, chanchinbu leh thingpun enkawl zui thate hnenah lawmman sem a ni a. Kumin hian kum danga la tih ngai loh Mamit District chhunga Ramsa seh avanga hliam tuar leh Rul chuk a vanga nunna chan te 1. Pu Zolianthanga s/o Zatluanga W. Lungdar, rulchuk a vanga nunna chan chu a nupui Pi Lalbiakthangi hnenah Ralna pawisa Rs 1,00,000/- hlan a ni a, Thangbiakliana, N. Sabual savawn seh a vanga hliam tuar hnenah tanpuina Rs 16,200/- hlan niin C. Lallawmkima S/o Zalutpuia, Mamit Dinthar Zawngseh avanga hliam tuar hnenah Rs 5,500 hlan a ni bawk.
Vawiin Green Mizoram Day 2014 pual hian nikum lama Mamit leh Bairabi inkara thing tiak phunna hmun te tihfai leh phun belh hna thawh a ni a, sorkar department hrang hrang bakah zirna in leh tlawmngai pawl hrang hrang ten tha thawhin, plot thar 8 siamin thingtiak 120 phun thar a ni a. Kumin hian thiangtiak 210 phun belh tura ruahman a ni.
Green Mizoram Day 2014 hawnna hunah hian lawmman hrang hrang District chhunga ramkang veng tha khaw pathum hnenah lawmman hlan a ni.
1-na - Chungtlang
2-na - W. Serzawl
3-na - Kanghmun
Kangmei ven kawnga chanchinbu titha te :
1-na - Mamit Times
Consolation - Zotlanglentu, Mamit Post, Zolamtlung, Lentupui .
Green Mizoram Day hnuaia thingphun leh enkawl zui hna thawk tha te :
1-na - SSA (DPO & BRC) leh Mamit Pastor Bial TKP
2-na - DRDA
Anni hian nikum lama an thingtiak an phun nung vek a ni. Lawmman te hian pawisa fai leh Citation a keng tel a ni.
