Vawiin khan Mizoram State Cancer Control Society (MSCCS) meeting vawithumna chu an Chairman Pu Lal Thanzara, Health Minister hovin Chief Minister’s Office Conference Hall-ah neih a ni a. Hetah hian Mizoram Legislative Assembly Deputy Speaker Pu R.Lalrinawma pawh a tel a ni.
Meeting-ah hian kum 2011 atanga 2014 chhunga MSCCS chetvelna leh sum hman dan hrang hrangte thlirho a ni a. Hemi hun chhung hian cancer natna chungchanga hriattur pawimawh inhrilhriatna leh cancer vei leh vei lo endikna (Cancer awareness & early detection programme) chu khua leh veng hrang hrangah neih a ni a, doctor leh nurse te tan a bika training buatsaih thin niin AIR leh DDK kaltlangin mipui hriat tur tul puanzarna leh zawhna leh chhanna hun te an hmang a. World Cancer Day chu February ni 4 ah hman thin a ni bawk.
Inkaichhawn theih loh natna Non Communicable Diseases (NCD) hi India ram mipui thihna tam tak thlentu a nih avangin sorkar laipui chuan National Programme for Prevention and Control of Cancers, Diabetes, Cardiovascular Diseases and Stroke (NPCDCS) chu 11th Five Year Plan hun lai khan a kalpui tan a. Mizoram pawh tuna Five Year Plan kal mek (12th) hun chhung hian hmang tan tura tih a nih angin kalpui tan mek a ni a. Sorkar laipuiin kalphung thar a duan ang hian Health Society hrang hrangte khaikhawmtu tur Mizoram Health Society (MHS) din a ni ta a ni. MHS hnuaiah hian Health Society hrang hrangte chu zai khatin an luangkhawm a. Sorkar laipui atanga sum lokal pawh Mizoram State Cancer Control Society-ah lut lovin MHS kaltlanga tih vek tur a nih tak avangin vawiin Mizoram State Cancer Control Society meeting chuan sorkar laipuiin inkaihruaina thar a duan chu zawmin he society tihtawp hi a rel thlu ta a ni.
Mizoram State Cancer Institute (MSCI) Zemabawka awm mek hi tun dinhmunah sorkar laipui chuan Regional Cancer Centre angin a pawm a. State cancer institute a hlangkai turin a tlem berah khum 100 tal a tih len a tul avangin hetianga hospital tih changtlun nan hian sorkar laipui chuan sum cheng vaibelchhe 45 a ruahman a, heta za a sawm hi Mizoram sorkarin a tum thung ang. Meeting hian he thil hi chak taka bawhzui tul tiin MSCI hotute kutah a dah a ni.
