Vawiin chawhnu khan kar khat chhung awh, All India Civil Services Badminton Tournament - 2017 R.Dengthuama Indoor Stadium, Mualpui-a neih chu a tiak a. AICSBT-2017 kharna inkhawm ah hian Pu Thianghlima Pachuau, DGP, Mizoram chuan khuallian niin a hmanpui a.He hunah hian sawrkar mipawimawhte bakah state sports-a mipawimawh te an tel a ni.

AICSBT-2017 kharna inkhawma thusawitu, Pu Thianghlima Pachuau, DGP, Mizoram chuan A thlengtu, Mizoram sawrkar aiawhin state dang atanga badminton khel tura lokal official zawng zawng te chunga lawmthu hrilh in Mizoram rawn tlawh chhunzawm zel turin a sawm a. Sports chu hriselna kawnga mitin mamawh a nih piah lamah mize chi hrang hrang te tana inpawhtlanna siamtu leh huang khata min huikhawmtu a nih thu a tarlang a. India ram chhunga sawrkar hnathawk ten sports meet an neih thin chu India ram chhunga chengte tana inpumkhatna siamtu atan a tangkai thu leh state hrang hranga cheng ten inunauna an neih chhunzawm zel na tura hmaraw pawimawh tak a ni a ti.

Pu H.L. Rochungnunga, Secretary, S&YS leh Working Chairman, AICSBT 2017 in sawrkar hnathawk te intawhkhawmna, Badminton khawmpui kharna hi a kaihruaia; he hunah hian Report tawi, Pu Zothanmawia, Organising Secretary hnen atangin ngaihthlak a ni.

AICSBT 2017 ah hian Central Secretariat, State secretariat te leh State Civil Services Badminton Team te an kal tha hle a. Tun tum hi Mizoram in AICSBT a thlen vawi 4-na niin Badminton Player 526 an tel a ni. He tournament ah hian category 12 awm in match 520 ah game 818 khelh niin Gujarat Civil Secretariat chuan player 26 thawhin he tournament a team thawhhlawk ber an ni a. Men's Single Final ah S.Naveen Kumar, Andhra Pradesh chuan Ismael-a, Mizoram hnehin a champion a, Women's Single ah Swati Sharma, Central Secretariat, New Delhi chuan Roselin Begum Syeda, RSB, Shillong hnehin a champion thung. Men's double ah A.K.Sudarsan leh E.Yuvaraj, RSB Chennai Champion in Women's Double ah Naqvi Parssa leh Shaziya Khan RSB Kanpur/RSB Mumbai an champion thung a ni.

Attachment

  • Loading attachment...