Mizoram State Day Vawi 30 na puala Mizoram Governor thuchah -
Mizoram State Day-ah hian, Mizoram mipuite thinlung takin lawmpuina chibai ka buk a che u.
Kum sawmthum kalta vawiin ni angah khan Mizoram tana mel lung pawimawh tak chu phun a ni a. August ni 14, 1986-ah President in remtihna hming a ziah hnuah Mizoram chu India rama State 23-na ni turin February ni 20, 1987 khan Assam Rifles Ground, Aizawlah a lawmna hun hmangin hlankai a lo ni ta.
Mizo mipuiten State nihna nei tur leh remna leh muanna nei thei tura man an pek a sang hle a, kum 20 chhung teh meuh ram buai kan paltlang a nih kha. Chuvangin harsatna tam tak paltlang hnua State kan sual chhuah hi kan ngaihlu tur a ni a; Mizoram hian State dangte aiin hmasawnna kawng zawh tlai deuh mahse kawng thenkhatah erawh chuan an um phak loh khawpin hma a sawn chak thung a ni. Mizoramin kawng dik a zawh theihna tura mipui leh sawrkarin tha thlah hauh lova an beihna hi a chhuanawm ka tiin ka lawmpui che u a ni.
Mizoram State hian kum sawmthum chhung khan thil inthlakthleng tam tak leh harsatnate pawh a paltlang a, heng zawng zawng hian State than zelna kawngah nghawng inanglo tak tak a nei a. Mizo khawtlang nun danglam tak, thenrualte nena insuihzawm tlat kan nihnate hi a hlu a. Inpumkhatna tha tak kan neih hi hmang tangkaiin tun aia lehkhathiam, fing leh remhria, hrisel leh mahni mawhphurhna hlenchhuak thin hnam kan nih zel ka beisei a. Chutiang thinlung kan put phawt chuan State thangduang, mi dangte el rual loha hmasawnna rahbi sial zung zung, ram dangte tana entawn tlak State ni tura kan kawng dal thei tur a awm lo.
Kan hmalam hun kan thlir chuan, phatrual lohvin Mizoram hi chak taka hmasawn thei tur dinhmunah a ding a. Thutlukna kan siam zawng zawng leh kan ke pen tinte hian Mizo mipuite beiseina leh theihna famkim lanchhuahna tur a hril a ni tih hria ila. A panna kawng thui leh biboh tak hi kan zawh chhuah phawt chuan hlawhtlinna par zu thlum takin min hmuak a ni.
He ni chhinchhiahtlak takah hian mi zawng zawng duhsakna ka hlan nawn leh a che u.
Jai Hind.
