Ram pum huap Cooperative Week vawi 61-na chu vawiin khan Archives Hall, Babutlang,Aizawl ah Mizoram State Cooperative Union huaihawtin Cooperation Minister Pu Lalrinmawia Ralte hovin hman a ni.

Minister chuan mi hausa tlemte kuta engkim a awm loh nan leh mi harsa leh rethei zawkte leh mipui vantlang chhawr tangkai tura thawhhona hmalakna atan cooperative chu ruahman a nih dan te leh a pawimawhna te a sawifiah a. Mizo te chu thawhhona hlawk zia hre reng chunga cooperative zawnga hmalakna ngaihlu tawk lo ni-a sawiin mipui vantlang hamthatna tura hmalakna a nih dan leh thawh chhoh dan tur te uar zawka inzirtir zel a pawimawh dan te a tarlang bawk. Ni 14-20 November, 2014 chhunga Cooperative Week hman chhoh tur chuan cooperative hmalakna ah hmasawnna rahbi thar a hrinchhuah ngei a beisei thu a sawi lang bawk. Minister hian MSCU website siam www.mscu.in chu a hawng nghal bawk a ni.

Vawiin Cooperative Week hawnna inkhawm hi MSCU President Pu Lianthangpuia’n a kaihruai a, Pu Lalpekliana, Addl. RCS, Mizoram pawhin thusawiin Pi TC Lalchawimawii, FEO, MSCU chuan Mizorama Cooperative hmalakna chanchin tlangpui report a pe bawk. Mizoram ah Cooperative Society hi kum 1949 ah neih tan a ni a, tunah hian Industrial Cooperative Society, Multipurpose, Dairy, Livestock, Piggery, Handloom, Farming, Poultry, Consumer etc chi hrang hrang awmin Mizoram pumah Society 1490 an awm mek a ni.