Health & Family Welfare Minister Pu Lal Thanzara chuan vawiin khan I & PR Auditorium-ah World Diabetes Day puala National Programme for Prevention and Control of Cancer, Diabetes, Cardio Vascular Diseases leh Stroke (NPCDCS) leh Mizoram Diabetic Society (MDS) tangkawp tena he Ni hmanna programme an buatsaih chu a hmanpui.

Pu Lal Thanzara chuan khawvel a changkang chho zela, eizawnna leh veivahna lamah tha hmanna a tlem a, taksa insawizawina lama kan thatchhia a, ei leh in lamah kan fimkhur lovin kan in sum lova, mihring nawlpui hi kan awlthawng ta deuh niin a lang a. Chu chuan thau luattukna (obesity) a ti pung a, hei hian zunthlum veina chance a ti sang hle, a ni a ti. Khawvel leh ramchhunga a zunthlum vei an tam chhoh zel angin Mizoramah ngei pawh zunthlum vei an tam tawh hle a chuvangin he natna hi thangthar leh naupangten an hriat a tul tiin vawiina Fitness Run pawh hemi chungchanga awareness siam nana buatsaih a ni, a ti bawk.

Health Minister chuan Zunthlum hi natna enkawl dam har tak a nih avang leh hetiang taka hriselna khawih pawi thei thil a nih avang hian a vei lo tura mahni inven leh midangte hrilh hre tura theihtawp kan chhuah hi a hun takzet tawh a ni, a ti a. Ei leh in chungchangah fimkhur tlang ila, kan tui tih zawng ringawt ei-a in lovin, taksa tana tha tur kan thlan thiam a ngai a. Taksa sawizawina lam ngaihthah lovin hunbi neiin kan taksa sawizawi thin ila, zing thawh leh mut hunbi dik kan vawng bawk tur a ni, a ti a. Zuk leh hmuam, zu leh ruihhlo te hi zunthlum natna vei theihna chance ti sangtu an nih theih avangin hengte lakah hian kan fihlim a tul hle a ni, a ti bawk.

Pu Lal Thanzara chuan Zunthlum do na kawnga tan la turin leh midangte hrialhhriatna kawnga nasa lehzuala ke pe turin kalkhawmte chu a chah a. Kum danga chuan hetiang programme ah hian zirlai naupangte kokhawm a, kum naupang zawkten heng thil hi an hriat theihna turin hma lak nise tiin a duh thu a sawi bawk.

He hun hmanpuitu dang Dr. K Ropari, Principal Director, Health & Family Welfare Department pawhin thusawiin zunthlum hian natna dang ken tel a ngah avangin a veite hian inenkawl uluk a ngaiin in check up te pawh a hun taka tih ngei tur a ni, a ti a. NPCDCS kaltanga zunthlum inenkawlna leh a veite hmuhchhuah anih theih nana hma lak chhoh zel a nih thu a sawi bawk.

He programme hi Pu T.Saikunga, President, MDS chuan kaihruaiin, Dr. Lalruatdiki Chawngthu, State Programme Co-ordinator, NPCDCS chuan he Programme hmalakna, a tum leh heng natna chungchanga Mizoram dinhmun te tarlangin, presentation a nei a. Dr. Evelyn V. L. Hmangaihzuali, District Programme Officer, NPCDCS chuan ‘Healthy Living & Diabetes’ tih thupui hmangin presentation neiin zunthlum chungchanga hriattur pawimawh te, invenna kawng awm thei te leh inenkawl dan te chipchhiar takin a tarlang.

Indian Council for Medical Research (ICMR) zir bingna atanga chhinchhiah danin Mizoram hian zunthlum vei za zela 5.7 an awm a, khawpuia za zela 8 leh thingtlanga za zela 3.5 vel vei awm nia chhut a ni.

National Programme for Prevention and Control of Cancer, Diabetes, Cardiovascular Diseases & Stroke (NPCDCS) hi National Health Mission hnuai a hmalakna niin natna benvawn thenkhat, inkaichhawn chi ni si lo ho - cancer, zunthlum, lung leh thisen zam natna, BP sang, chuap natna benvawn te a bika enkawlna tura duan a ni a. He programme hi Mizoram chuan kum February ni 4 khan hawn niin tunah hian heng natna enkawlna atan NCD Clinic leh NCD Cell te hi Aizawl leh Lunglei District-ah te hawn tawh niin hma lak mek a ni a, Champhai leh Saiha District-ah te pawh he hmalakna hi hawn thuai tum a ni.