School Education Department leh Health & Family Welfare Department huaihawta Fitness Run buatsaih chu tukin zing khan hman a ni a. Sikulpuikawn leh Chanmari atangin zirlai school naupang engemawzat te tlanin Lammualah an intawkkhawm a ni.

Lammuala intawhkhawmna hun buatsaihah Chief Minister Pu Lal Thanhawla chuan a hmanpui a. Sikulpuikawn leh Chanmari ah hian zing dar 6:30 ah kalkhawmin Health Minister Pu Lal Thanzara leh School Education Minister Pu H.Rohluna ten hmanpui bawkin zirlai naupangte rual hian Lammual an tlan thleng a ni. Lammuala intawhkhawmna hun, Pu Joseph Lalhimpuia, Parliamentary Secretary kaihhruaiah hian Chief Minister Pu Lal Thanhawla chuan mitinin hriselna tha kan mamawhzia tarlanna tura hetiang ‘Fitness Run’ buatsaih a ni chu a lawmawm hle a ni a ti a. He ni hi India Prime Minister hmasa ber Pu Jawaharlal Nehru piancham denchhena Childrens’ Day a puan anih thu leh zunthlum ‘Diabetes’ natna damdawi insulin hmuchhuaktu Frederick Banting piancham denchhena World Health Organisation (WHO) in World Diabetes Day a a puan ni, ni bawk leh Prime Minister Pu Narendra Modi in India alo fai theihna tura Faina Beihpui, ‘Swachch Bharat Abhiyan’ campaign a hawn tak bawhzuina a anih thu a sawi a. Hriselna tha nei tur chuan zuk leh hmuama fihlim te, kan taksa chhung leh pawn leh kan chhehvel tifaia, kan ei leh inah fimkhura, inthununna tha vawn leh exercise lak chinte a pawimawh hmasa a ni a ti a. Pathian an kan duh chuan fai kan tum tur a ni tiin, Pathian kan an teuhna ber chu fai hi a ni kan ti thin si a a ti a. Vawiin atang hian hriselna tha nei theuh turin intiamkamna resolution i siam ang u tiin, kalkhawm zawng zawngte chu a sawm a ni.

Chanmari-a Fitness Run a vailiam hmain Pu H. Rohluna Minister, School Education chuan thusawiin khawvelah zunthlum natna hi a pung chhohin natna tlanglawm tak a ni tawh a. Chuvangin kum naupang zawk leh zirlai naupang he natna chungchang an hriat leh a inven dan kawng an hriat hi a pawimawhzia hriain he Run hi buatsaih a ni a ti a. Naupang te thil tha lo laka fihlim tur leh insawizawina uar turin a chah a ni.

Sikulpuikawn ah hian Pu Lal Thanzara, Minister Health & Family chuan thusawiin hriselna tha neih chu mihring tan malsawmna a ni a tiin kum naupangtea atanga taksa insawizawina te uar a, ei leh inah te in sum a, zuk leh huam lak a fihlim chuan hriselna tha leh tlo kan neih thei a ni, a ti a. Health Minister chuan he hunah naupang kalkhawmte chu an taksa tana thil thalo leh thil hrisel lo te chu tih chhin duhna rilru pu lova, nun kawng dik zawh turin a fuih a. Hriselna tha nei turin chuan mahni inthunun a tul a tiin nun fimkhur a ngai thu a sawi a, naupangte chu tun atangin an nun fimkhur turin a chah bawk a ni.