Kum tinin ICDS chuan November 14 hi ‘Naupangte Ni’ a nih denchhenin hemi kar hi ‘ICDS Week’ atan an hmang thin a. Kuminah chuan Central Sawrkarin faina beihpui a thlakna ‘Swachh Bharat’ pêng pakhat, naupangte pual faina beihpui, “Bal Swachhta Mission’ chu ram pum huapa hman tura rel a nih angin Serchhip-ah pawh Anganwadi Centre zawng zawngah he faina beihpui hi hman a ni a, a hawnna inkhawm tawi chu P&E Venga Anganwadi Centre No. – I-ah Chief Medical Officer Dr. Laldawngliana Sailo hova hman a ni.

He huna khuallian Dr. Laldawngliana Sailo chuan faina hi thil pawimawh tak a ni a, naupan lai aṭanga kan inzirtir a tul a ni tiin faina chu hriselna leh dam reina a ni a, zahawmna a ni bawk a ni a ti. Pu Dawnga chuan kan chenna in leh a chhehvel vawn faite a pawimawh em em rualin kan ei leh inte hi a faiin a thianghlim em em tur a ni a, tin hriselna kawnga kan inenkawlna, damdawi, bungrua leh hmanruate hi a faiin a thianghlim a pawimawh lehzual a ni tiin, zun leh ek atang hian natna tam tak a inkaichhawn theih avangin kan inthiar zawh apiangin sahbawn hmang ngeia kut sil zel hi a tul em em a ni a ti bawk.

Naupangte pual faina beihpui hawnna inkhawm hi Pu Lalbiakliana Circle Officer, ICDS Serchhip Project chuan a kaihruai a, Anganwadi naupangten an thil zir te an entir a, khuallian leh sawmbik ho ten Anganwadi an tifai nghal bawk a ni.