Nimin khan Lawngtlai District chhung Bungtlang ‘S’ a Public Information Campaign a ni hnihna neih leh a ni a, Lawngtlai District Bawrhsap Pu J. Hmingthanmawia chu khuallian a ni.

Thu sawiin Bawrhsap chuan PIC chhim a kalkhawm mipuite chu tangkai tak leh hlawkpui nana hman tum turin a fuih a, khua leh tui ten sawrkar kalphung leh hna thawh dan kan hriata sawrkar thiltum chiang taka kan lo hriat hi a pawimawh hle a ni a ti. Khuallian hian tunlaia Central sawrkar programme thar ber ber Swachh Bharat Abhiyan te, Saansad Adarsh Gram Yojana te, Pradhan Mantri Jan-Dhan Yojana te leh Right to information Act thiltum tlangpuite kalkhawm te hi a hrilh a, heng hmasawnna programme tharah te pawh hian mipui ten tihtur tam tak an neih ve bawk avangin kan zavaia kan hriat tlan a pawimawh a ni a ti bawk.

Chawhma lam inkhawm hi Pu K. Saitluanga, MIS, DIPRO Lawngtlai in a kaihruai a, a ni pawh hian Public Information Campaign thil tum tlangpui a tarlang a, Pu Mangjangam Touthang, IIS, PIC Core Committee Chairman pawhin kalkhawmte lawmna thu leh PIC hmanga hma lak dan hrang hrang te a sawi ve bawk.

Chawhnu lamah Pu H. Lalrinmawia, Editor Rameng Daily News Paper kaihhruaina in Technical Session neih a ni a. He hunah hian Pu K. Saitluanga, MIS, DIPRO Lawngtlai District in Right to Information Act chung chang zirtirna neiin, Pu Lalhmangaihzuala, Manager MRB Bungtlang ‘S’ Branch in Pradhan Mantri Jan-Dhan Yojana chung chang zirtirna a nei bawk a kalkhawm ten zawhna an zawh hrang hrang ten an chhang nghal bawk.

Nimina PIC ni hnihna ah hian Bungtlang ‘S’ khawchhunga zaithiam hrang hrang leh Song & Drama Division ten kalkhawm te hi zai leh lam in an awi a, Tv. Chanchinmawia’n Talent show a nei bawk.