Nimin khan Lawngtlai Council Veng ten Lawngtlai Bazar atanga an indan kum 35-na (Coral Jubilee) lawmna an nei a, Minister Pu Ngunlianchunga chu khuallian niin a hmanpui.

Lawngtlai Council Veng VC te hian kumin kumtir lam atang khan an Jubilee lawmna an lo nei tan tawh a, nimin khan a lawmna pui ber chu YLA Hall ah an nei a ni. Zingkar khan Council Office Gate bula Jubilee lungphun an buatsaih chu Pu C. Ngunlianchunga, AH & Vety Minister chuan a hawng a, chhun dar 10 atangin Council Veng YLA Hall ah a lawmna hun hmang chhunzawmin, he hunah hian Khuallian chuan Council vengin nasa taka hma a sawn chu lawmawm a tih thu sawiin, kan tu, kan fate than lenna tlak Veng nuam kan siam a pawimawh hle a ni a ti.

Vengchhunga Kohhran hrang hrang te, tlawmngai pawl hrang hrangte in lungrual taka kan kal a, chhiatni thatni ah mipuite in nghah ngamna kan nih zel theihna turin lungrualna hi kan thupui lo ni fo rawh se a ti. Pu C. Ngunlianchunga hi Lawngtlai Council Veng atang hian MDC term li thlantlin alo ni tawh a ni. Jubilee lawmna ruai khawtlang huapa theh a ni a, zan lamah Programme hlimawm tak an hmang zui nghal bawk.