Trained Nurse Association member te chuan an Golden Jubilee lawmna kal zelah vawiin khan Aizawl Civil Hospital ah leh Synod Hospital Durtlang ah thisen pek runpui an nei.
Aizawl Civil Hospital-a thisen pek runpui hawnna inkhawm hi Aizawl Civil Hospital Auditorium-ah neih a ni a. He hun hi Pi P.C. Chuaudingliani in kaihruaiin Pi Ngurkhumi Sailo in hunserh a hmang a, Intihhlimna hrang hrang nen hun hman a ni.
Hawnna thusawitu Dr.Rosangluaia, Medical Superintendent Aizawl Hospital chuan Nurse te hlutna leh pawimawhna a sawi a. Nursing tha hi chhungkua, khawtlang leh ram tan an pawimawh a. Daktawr te ai pawhin nurse te hian damlo te in awmpui nasa zawk a, in pawimawhna hi in hriat chian a ngai a. Hmangaihna thinlung nena ke pen zel turin ka chah duh che u a ni a ti. Hemi hnu hian Pi Khawlliani Civil Hospital Aizawl in lawmthu sawina hun a hmang bawk.
Aizawl Civil Hospital-ah hian Hospital leh Nursing Institution hrang hrang 7 atangin thisen pe an kal khawm a. Thisen pek tling khawm hi mipa 45, hmeichhia 57, a vaiin unit 97 lai a tling a ni.
Synod Hospital, Durtlanga Thisen pek runpui hawnna inkhawm hi Mrs. Rosailovi ANS, Synod Hospital in a kaihruai a. Dr. B.Lalnunthari Medical Officer Blood Bank hnen atangin thusawi ngaihthlak a nih bakah intihhlimna chi hrang hrang neia hun hman ho a ni bawk. Durtlang Synod Hospital-ah hian Hospital leh Institution hrang hrang atangin thisen pe an kal khawm a, thisen petu te mipa 4 leh hmeichhia 9 an ni. He ti hian TNAI member ten Golden Jubilee puala thisen an pek zawng zawng tlingkhawm hi Unit 110 lai a ni. Institution anga thisen pe tam ber nihna hi Health Worker School, Kulikawn ten an hauh a ni.
