Vawiin chawhnu khan Pu Joseph Lalhimpuia, Parliamentary Secretary, Education,etc., chuan a Office ah Education Department leh Health Department hotute kawm in naktuk, November 24, World Diabetes Day, 2014, Children’s Day ni bawk hman dan tur a sawipui a.World Diabetes Day pual hian sikul naupangte tan fitness run programme ruahman a ni a. He hunah hian sikul naupang-te hi pawl 2 ah inthen in Aizawl chhim lam leh hmarlama hmun pakhat ve ve atanga rawn tlan tanin Lammual an tlan thleng ang.

Meeting kaihruaitu Pu Joseph Lalhimpuia, Parliamentary Secretary chuan World Diabetes Day leh Children’s day chu kumtin, Sikul naupangte leh thalaite hnena hriselna zirtirna atana ni tangkai taka hman a nih tur thu a sawi a. He hunah hian mahni inthununna leh taihmakna atanga hriselna awlsam taka neih a nih theih dan te chiang zawka sikul naupangte zirtir an ni ang a ti a. He zirtirna hian nakin zelah atan rah tha chhuah a chhuah a beisei awm thu a sawi a. Sawrkar sum hmanralna lianber zinga pakhat damlo enkawlna atana sawrkar senso tihhniam nan hriselna kawnga nasa zawka zirtirna kalpui a tul thu a tarlang bawk a ni.

Fitness programme pual hian zirlai 1300 chuang chu pawl 2 ah inthen in zing 6:30 ah Sikulpui kawn atang leh Chanmari Kawn atanga tlan tan in Lammual an tlan thleng anga. Lammual ah World Diabetes Day leh Children’s Day pual programme buatsaih turah an tel ang. Lammual a programme ruahman tak hi Zing dar 7:30 ah tan a ni anga, he hunah hian Chief Minister Pu Lal Thanhawla chu khuallian a ni ang. Chanmari Kawn a programme tawi buatsaih tur hi School Education Minister Pu H.Rohluna’n a hman pui anga Sikulpuikawn a programme buatsaih turah Health & Family Welfare Minister Pu Lal Thanzara a tel thung dawn a ni.