Vawiin zing dar 11:00 khan All India Cooperative Week Vawi 59-na leh International Year of Cooperatives 2012 lawmna inkhawm Cooperation Minister Pu J.H. Rothuama kaihhruainain Vanapa Hall-ah neih a ni a. He hun hi Home Minister Pu R. Lalzirliana’n khuallian niin a hmanpui a. Programme hi Cooperation Department in NCDC leh IFFCO te nen tangkawpa an huaihawt a ni.

Pu R. Lalzirliana chuan All India Cooperative Week tobulte sawiin, hruaitu hmasaten Cooperative thatna hmua an ngaih pawimawh ang takin sawrkar pawhin cooperative hmasawn nan Development Council hial a din tawh thute a sawi a. UNO chuan, Cooperative hi khawvel huapa mipui inhlawmkhawmna lian leh tangkai berte zing ami a nih hriain UNO General Assembly, December ni 18, 2009-a Resolution No. 64/136-na angin, kum 2012 hi International Cooperative Year atan puan a passed a, an chhinchhiah dan pawh ‘Cooperative chuan Retheihna umbo kawngah te, hnathawh tur siam kawngah te leh mipui vantlang inpumkhatna kawngahte a thawh hlawk hle’ tih anih thu a sawi bawk.

Home Minister chuan khawvelah hian Cooperative hian member maktaduai 850 chuang a nei a, thawktu maktaduai 100 chuang a nei a, Loneitu za zela 65 chuang hi Cooperative Sector a mi an ni, a ti a. Khawvel puma thil dehchhuah tamna ber hi Cooperative kutkhawih a ni tih UNO hian a hriain Cooperative inzawmkhawmna (Internatioanal Cooperative Alliance (ICA) chu thawhpuiah a sawm thu a sawi lang a. UNO hian Cooperative hmalakna ngun taka a thlir hian, khawvel thar tha zawk her chhuak thei dawn hian a hre tlat a, chuvangin vawiin nia Cooperative Week thupuiah pawh Cooperative Enterprises Build a Better World tih chu thlan a ni, a ti. Cooperative inlumlet atanga khawvel duhawm zawk chher chhuah tih hi Mizoram sawrkarin NLUP a kalpui hmangin thui tak a tihhlawhtlin theih dawn a ni tih hi ka ring tlat, a ti a. Chu chu a kengkawhtu leh nakin zela tangkai turin Cooperative mi leh sate lo inruahman turin a chah a ni.

He hun kaihruaitu Cooperative Minister Pu J. H. Rothuama chuan Cooperative te hi NLUP peng hrang hranga tangkai taka hman an nih thei dante sawiin State level cooperative society 11 hmangin hemi kawnga hian eng tin nge chak zawka hma lak anih theih dan ngaihtuah a tul a ni, a ti. Pu Ranbir Singh, I.A.S, Cooperation Secretary leh Pu Lalpekliana, Addl. RCS ten Cooperative tangkaina leh hlutna te sawiin tang sauh sauh turin Cooperative mi leh sate hnenah fuihna thu an sawi bawk a. Week leh International Year of Cooperative 2012 puala Governor leh Chief Minister thuchah chhiar chhuah a ni bawk a ni.

Home Minister Pu R. Lalzirliana chuan All India Cooperative Week leh International Year of Cooperative lawmna puala Souvenir buatsaih chu a tlangzarh nghal a. Cooperation Minister Pu J. H. Rothuama, MSCU President leh Cooperation Department-a senior officer te hian Cooperative Movement in Mizoram; Handbook of Farming Cooperative Society; Handbook of Consumer Cooperative Society ; Handbook of Pig Producer Cooperative Society ; Handbook of Primary Multi-Commodity Producer Cooperative Society; Handbook of Handloom Cooperative Society leh Sericulture Cooperative Society tih lehkhabu te chu an tlangzarh bawk a ni.

Rev. Lalrinmawia’n hunserh hmangin Pu Lalnunsanga, President, MSCU in lawmthu sawiin hun a khar a ni.