Transport Minister Pu PC Zoramsangliana chuan, Mizote hi a huhova thil ti thin, a hranga thiltih thiamlo kan nih mek laiin Co-operative Movement kan ti hlawhtling theilo hi chu kan in enchain a ngai a ni, a ti.

Vawiina Kolasib Project Veng AMFU Hall-a 59th All India Co-operative Week leh 2012 International Co-operative Year lawmna hun hmanpuiin he thu hi Pu PC. Zoramsangliana chuan a sawi a. State leh District level-a Co-operative hnathawktute pawh hian Co-operative societies pawimawhna leh an hlawhtlinna atanga nitin mamawh thil man thlenga control theih a nihzia te, dinchhuahpui thama thawh theih a nihzia te uar zawka tlangaupui tul a tih thu a sawi a. Tuna NLUP thangduang tak pawh hi a hlawhtlinna kan hmuh theih nan Co-operative societies hi a bul ala ni dawn a ni, a ti. Kolasib District phei chu Leilet, Sangha, Oil Palm –ahte a hming lang tam ber a ni a. Mizoram chhung tihausa thei khawpa ram tha neitu an nih avangin a taka thawktute in pawimawh hle a, tharchhuah tipung turin tan i la sauh sauh ang u, Minister chuan a ti a ni.

Inthlan a hnaih tawh avang maia party thenkhatin thu dik ziktluak lo hmanga mi rilru kawihpen an tum ta mai chu hriatthiam harsa a tih thu Pu Ramsanga chuan a sawi a. Mi pakhatin kan sawrkar veleh Motor/Vehicle Life time tax kan titawp ang tia a sawi mai tehi Dan belchianga thil hrethiam pha chin tan chuan sawi awm chi a ni lova. India ram dan zawma he thil hi tih a ni zawk a ni, a ti a. VAT 6% motor eng chi pawh tana lak pawh hi India ram state zawng zawng te hman tura Transport Minister kalkhawmin alo passed tawh leh chu chu nikum Sept. 2011 khan Congress MLA te leh Opposition MLA bakah party hrang hrangte remtihna lak alo ni tawh a ni a, hetah hian Commercial Vehicle chu an tel velo nghe nghe a ni, a ti.Tuna kan hman mek 6% chu Central-a meeting neihah a aia hniam chu thil theih loh tawp a ni, tia Central Minister-in alo sawi tawh a ni,a ti. Tunlai khawvel hi duh duh sawina khawvel a ni tawh lova, Thudik chu miin Internet leh thuziak dang hmangin awlsam takin an hre thei tawh a ni, a ti a ni.

Co-operative Week & Year lawmna inkhawm hi Pu Vanlalchhandama, ARCS, Kolasib-in a kaihruai a. Pu SK Das chuan report a pe a. Pu Liansanglura, Manager,Apex Bank Ltd. Leh Pu VL. Sawma, Manager, LPG, Mizofed ten VIP thuchah an chhiar chhuak a. Co-operative Societies aiawh mi pahnih hnen atangin thusawi ngaihthlak a ni bawk a ni.