Vawiin chawhma dar 11:00 khan Serchhip Hmar veng YMA Hall-ah 2012 International Year of Co-operative leh All India Co-operative Week vawi 59-na hman a ni a, Serchhip District chhunga Department Head hrang hrangte leh Co-operative Society member hrang hrangte an kalkhawm a, District Bawrhsap Pi Juhi Mukherjee chuan khuallian niin a hmanpui a ni.

Khuallian Pi Juhi-i chuan Mizo tawnga thu tawi sawiin Serchhipah Co-operative Society changtlung taka a ding leh memberte thahnemngai taka an thawk ho chu lawmawm a tih thu sawiin taima leh inlungrual taka thawk ho chhunzawm zel a Co-operative hmanga Mizoram nuam zawk siam thei tura tan la turin a chah a, International Co-operative Alliance Thuchah a chhiar chhuak nghal bawk a ni.

Co-operative chu pawl pakhat mahni duhthlanna ngeia inrelbawlna hrang nei tura duan, tum leh duh thuhmun nei a ni a. Neitu bik awm lo, ei leh bara intodelhna tur te, mipui vantlang mamawh phuhruk leh hmasawn zelna tura thawk pawl niin tunah hian khawvel ram hrang hrang 100 chuangah co-operative member maktaduai 800 chuang an awm a, International Co-operative Alliance (ICA)-in kum hnih dana a thlan thin, khawvel huapa society tha 300 te kumkhat sum deh chhuah ringawt pawh US Dollar tluklehdingawn 1600 (1.6 trillion) lai a ni. Kum 2012 hi United Nations Organization (UNO) chuan Year of Co-operative-ah puangin hemi denchhen hian thupui thlan bik a nei a, chu chu ‘Co-operative Enterprise ten khawvel nuam zawk an siam’ tih a ni.

He hun Pu Lalrinthanga, Manager MIZOFED, Serchhip Manager kaihhruaiah hian Co-operative chungchanga UNO Press Release te, International Labour Office thuchhuah te bakah Governor Pu Vakkom Purusothamam, Chief Minister Pu Lal Thanhawla leh Co-operation Minister Pu JH Rothuama te chuchahte ngaithlak ho a ni.