3743/2022-2023

Aizawl the 3rd March, 2023 : INTACH Hqrs, New Delhi bultumin nimin March 2, 2023 khan DIET Aizawl Auditorium, Chaltlang ah INTACH Mizoram Chapter leh Directorate of School Education, Mizoram chuan All India Essay & Poster Competition, 2023 - 'Khana Khazana: My Food Heritage' - chu school naupang Class 7-9 zirlaite tan an buatsaih a, Aizawl chhunga school hrang hrang atangin naupang engemaw zatin he inelnaah an tel a ni.

He All India Essay & Poster Competition-a zirlai tel zawng zawngte chu Certificate pek vek an ni dawn a. Regional Lawmman 100 leh National Lawmman 10 a awm a, chungte chu INTACH Hqrs in a rawn thlang dawn a ni. 

INTACH hian zirlaite tan hnamro (heritage) hrang hrang – khuanu duan sa (natural), mihring siamchawp (built heritage), hnam zia leh tawng (cultural heritage) an vawn a, humhalh duhna thinlung an lo neih zel theihna turin program a siam tawh thin a; Mizo zirlai chhuanawm tak tak lawmman dawng an awm fo tawh thin a ni.

Kumin State Level Essay leh Poster Competition-ah hian zirlai naupangte hian mahni hnam chawhmeh leh ei rawngbawl chungchang lem leh essay hmangin inelna an nei a. Mizote chawhmeh leh bawl hlo danglam tak Bai, sawhbawl, saum leh chingalte he inelnaah hian pholan an ni.