Mizoram Chief Secretary Pu Vanhela Pachuau (AGMU 1976) chu pension-a a chhuah dawn tak avangin nizan dar 6 khan All India Service Coordination Committee chuan Arya Mess, Police Headquarters Khatlaah thlahna hun an hmang.

Chief Secretary Pu Vanhela Pachuau thlahna hun hi All India Service Coordination Committee Mizoram Chapter Chairman Pu K. Lalnghinglova’n a kaihruai a. Dr SS Garbyal, IFS, Principal Chief Conservator of Forests leh Pu P.C. Lallawmsanga IPS, Principal Secretary, Disaster Management ten thlahna thu an sawi. Pu Vanhela Pachuau hnenah hian All India Service Coordination Committee aiawhin Pi Renu Sharma, IAS in Citation a hlan a, Pu C. Zorammuana, IPS in Bible a pe bawk.

Kum 36 zet Pathian khawngaihna leh malsawmna dawnga sorkar hna a thawh theih avanga lawmthu sawiin Pu Vanhela Pachuau chuan hetiang dinhmun thleng thei tura tanpuitu a thawhpuite zawng zawng chungah lawmthu a sawi a. Chief Secretary hna kum 3 leh a chanve lai chelh tura remchang siamsaktu Mizoram sorkar chungah pawh lawmthu a sawi a ni.

IAS (AGMU) Association Mizoram Chapter te pawhin an President Pu K. Lalnghinglova IAS kaihhruaiin Chief Secretary Conference Hall-ah nimin chawhnu khan thlahna hun an hmang bawk a. Addl. Chief Secretary Pi L. Tochhawng pawhin thlahna thu a sawi a ni.

Thlahna inkhawmah hian Mizoram sorkara All India Service hrang hrang IAS, IPS, IFS Officer te an tel tha hle a ni.