All India Service ten Mizoram an awm chhunga an awmna tur, cheng nuai 293.93 senga UD&PA Department hmalakna hnuaia sak, "All India Services Transit Accomodation" building, Mizoram Secretariat Complex ami chu vawiin tlai dar 4 khan Chief Secretary Pu Lalmalsawma, IAS chuan a hawng.

Building hawnna inkhawm hi Dr. C. Vanlalramsanga, IES, UD&PA Secretary chuan a kaihruai a. Khuallian Chief Secretary chuan thu sawiin, quarters indaihlohna avangin hun rei tak state pawn atanga All India Service mi leh sa Mizorama hunchhung reilo te te hnathawk tura rawn kal te tan thlenna leh chenna tur lama harsatna awm thin chu building thar sak hian a su kiang tawh dawn a ni, a ti a. Tun hma lamah transit accomodation lo siam tawh thin ni mahse khatih hunlai khan a luahtu tur lam an awm thin mang loh avangin, office building atan a mamawhtuten an luah zawm tak thu a sawi a. Hun lo kal zelah transit accomodation mamawhna a lo sang chho zel a, chu mamawhna puitlin tura UD&PA in an hmalakna chu lawmawm a tih thu Pu Lalmalsawma chuan sawiin, building chu tangkai leh lungsi taka a hmangtu tur ten an hman chhunzawm a beisei thu a tarlang bawk.

He hunah hian Pu K. Lal Nghinglova, IAS, Secretary, AH&Vety leh Pu LH Shanliana, IPS, ACB Director ten an Service aiawhin thu an sawi ve ve a. Pu C. Lalmalsawma, EE, UD&PA chuan building chungchang technical report pe in, Pu Zorammuana, UD&PA Director in lawmthu sawiin hun a khar a ni.

All India Services Transit Accomodation building sakna tur hian kum 2013 September khan work order chhuah niin, March ni 31, 2016 khan zawh a ni a. Ground floor leh Basement area bakah chhawng thum a awm a. 1st, 2nd leh 3rd floor ah te hian choka leh Air Conditioned Facilities awmna room pathum theuh bakah, common living room a awm vek bawk a. Basement ah hian Staff Quarters pahnih awmin, Group D Floor ah hian Caretaker quarters, Reception Counter, Common dining leh living room a awm a,  car parking area leh water tanky siam a ni bawk.