Nimin khan Chief Minister Pu Lal Thanhawla'n Hmarchhaka AYUSH Hospital hmasa ber cheng nuai 554.30 senga sak khum 50 awmna Integrated AYUSH Hospital Thenzawl chu a hawng a. Nimin vek khan Chief Minister in Social Welfare Department hma lakna hnuaia cheng nuai 359.83 senga sak Tribal Girls Hostel  pawh a hawng bawk a ni.

Integrated AYUSH Hospital leh Tribal Girls Hostel sak hawnna programme AYUSH Hopital tuala buatsaih a hian Pi Lal Riliani, President Indian Society on Tobacco & Health (ISTM) Mizoram Chapter; Health Minister Pu Lal Thanzara; Social Welfare Minister Pu PC Lalthanliana ; Parliamentary Secretary Pu TT Zothansanga leh Pu K. Lalrinthanga te; Pu Chalrosanga Ralte, MLA bakah Health & Family Welfare Department hotulute, senior doctor leh officer thahnem tak leh Thenzawl mipuite an tel a ni.

Chief Minister Pu Lal Thanhawla chuan Hmarchhaka AYUSH Hospital hmasa ber Thenzawl hawn a ni ta leh Tribal Girls' Hostel hawn a ni ta te chu Thenzawl tan hmasawnna kawnga rahbi thar tukna ni a nih thusawi a. AYUSH hnuaia Ayurveda, Unnani leh Siddha te chu India ta bik a nih thusawiin, a hnuaia inenkawlna te hi a hautak lovin mi harsa leh mi rethei zawk te banphakin engkim a awm a ni, a ti a. Amah tawn hriat ngei atangin Sawrkar damdawi inah te duhthu sama hmanrua tha a awm loh thu sawiin heng te hi tan lakna tur a ni a, Aizawl leh Lunglei-a Civil Hospital ah te MRI khawl leh District Hospital tinah CT Scan khawl te dah tumin hma lak mek a ni a, hriselna lama thawk a bik takin mithiam te tan tan lakna tur a la tam thu a sawi bawk. Thingtlanga hriselna lama chak zawka hma lak anih thei nan National Health Mission sum hmangin Health Worker 200 vel lakna turin inbuatsaih mek anih thu a sawi.

Chief Minister chuan kut tling lova sum la tumtu leh an thurualpui ten Mizorama project lian tak tak Tuirial Hydel Project leh Sairang thleng tur rel kawngte an tihkhawhtlai thusawiin kut tling lova sum la tum ten hmasawnna an tihthuanawp a ni, a ti a. Pathianin min hunna apiangin hi a rawngbawl turah min dahna a ni a, he kan mawhphurhna hi kan mihringpui te ah a tawp lova, Pathian hnenah a tawp a, chumi hriatna nen rinawmna, dikna leh taimakna nen hma kan lak a ngai a ni chutiang chuan he hnam hi kan kal a pawimawh a ni, a ti a. Pathianin Mizoram chu sik leh sa nuam tak  leh ram tha tak pein mal a sawm thusawiin hengte hi kan hman rim a, mi dangte ngheng reng lovin ei leh bar, sum leh paia intodelh hi kan tum a ngai a ni, a ti.

Hmasawnna chungchang sawiin Chief Minister chuan Hmasawnna kan neih zel dawn chuan kan rilru tih zauh a ngai a, tunlai khawvel her danglam nen kan ngaihtuahna leh kan rilru te hi kan her mil a ngai a ni, a ti a. Mizoramin kawng hrang hranga hma sawn zel turin hmathlir thiam a ngai a, hmathlir tha leh thui tak naktuk, naktip daih mai nilo, kan chhuan lo awm zel tur daih ngaihtuah a pawimawh tih sawiin tun hmaa Kolkata Salt Lake a Mizoram sak leh Lengpui Airport te sawiseltu te chu a hmang tangkai ber ber ani tawh a tiin Thenzawla Golf Course cheng vaibelchhe 94 senga siam tur pawh hi hetianga hmathlir thui tak neia ngaihtuah leh duan a nih thu te a sawi a ni.

Pu Lal Thanhawla chuan Thenzawl chu ram laili leh ram rem anih avangin kawng hrangah Sawrkarin helai hmun hi tih hmasawnna a tum thusawiin Horticulture College dah a ni dawn a, Handloom leh Handicrafts centre anih theih buatsaih a ni mek a, Tourism project a kal mek a mahse lawmna chang kan hria, duhsak tlaka kan awm hi a pawimawh a ni, a ti a. Thenzawl mipuite chu an ram neihsa ren turah chahin mi thil ti thei te tlawn zawnga hmang lova, an ram chu an chhuan lo awm zel turah atan zuah a, inveng thiam turin a chah bawk a ni.

AYUSH Damdawi inah thawktute chu an mihringpui te rawngbawlna kawnga theihtawp chhuah tura chahin hmangaihna rilru nen a pantu te hi angakhata en a, hausa leh rethei, mi lian leh mite thlair loturinka chah duh che u a ni, a ti a. A pantu te pawhin he damdawi in hi inkanzavai ta ani tih hria, a thianghlima kawnga mawhphurnakannei theuh anih tih hi hreturinka chah duh bawk che u, a ti.

He hunah hian Pi Lal Riliani,PresidentISTMMizoramChapterIntegratedAYUSHHospitalhawnna hriatrengna atana Souvenir buatsaih a tlangzarh a ni.

Programme hmanpuitu Health Minister Pu Lal Thanzara chuan AYUSH chu India chhulchhuak damdawi inenkawlna anih thusawiin Indian System of Medicine thatzia leh ropui zia te hi Mizoramin kan hmel hriat chhoh mek a, state dangten an hman tangkai hle tawh a, Mizoram pawhin kan tangkaipui ka beisei a ni, ti a. AYUSH hmalakna hnuaia Mizoram ramhmul leh ramhnim damdawi te humhalh mek ani a tiin hengte hi enchin mek turin hmachhawp leh hmathlir Sawrkarin a neih thu a sawi a. AYUSH Hospital sakna nana a thlawna ram petu te chunga lawmthu a sawiin Thenzawl mipuite chu duat leh dimdawi taka damdawi in thar enkawl turin a chah a. Health Minister hian AYUSH Hospital sak ani thei nana theihtawpchhuah puitu mimal panga hnenah lawmthu sawina thuziak a hlan bawk a ni.

Thusawitu dang Social Welfare Minister Pu PC Lalthanliana chuan Thenzawl ah mipuite te hman tangkai atana hmasawnna ruhrel cheng vaibelchhe 9 chuang man hman theih a hawn a ni ta chu khawtlang tan thil ropui leh lawmawm tak anih tih sawiin chawl lovin hmasawnna atan Sawrkarin theihtawp a chhuah mek a ni, a ti. He programme ah hian Parliamentary Secretary Pu TT Zothansanga pawhin thusawiin mimal ten he damdawi in sakna atan ram phal taka a thlawna an pe chu ropui a tih thu a sawi.

Integrated AYUSH Hospital hawnna inkhawm hi Commissioner & Secretary, Health & Family Welfare Department Pu Lalrinliana Fanai in kaihruaiin inlawmna thu a sawi a, Aizawl Bishop Most Rev.Stephen Rotluanga'n Pathian hnenah Hospital hlanna hun a hmang a. Dr. K. Ropari, Principal Director, Health & Family Welfare Department chuan AYUSH Hospital sak choh anih dante sawiin vawiin ni, ah hawnna ni kan thleng hi a lawmawm hle a ni, a ti a. Northeast Consultancy Services, CMD Pu Robert Romawia Royte-in he programme ah hian Tribal Girls Hostel sakna dan chungchanga technical report a pe a. Dr. C. Lallunghnema, Deputy Director (AYUSH), H&FW Department in Lok Sabha MP Pu CL Ruala leh hun hmasa lama Health Minister lo ni tawh Pu Lalrinliana Sailo ten theihtawp an chhuah puinaah lawmthu sawi telin programme kharna a hmang a ni.

Khum 50 awmna Integrated AYUSH Hospital sakna tur lungphum hi Chief Minister Pu Lal Thanhawla'n January ni 4, 2012 khan a phum a. Hospital sak hna hi January 2013 ah tan niin kumin July khan sak zawh a ni a, August thla atangin OPD inentirna hi hawn nghal a ni. He building hi cheng nuai 554.30 senga sak niin a satu contractor hi Pu T. Thanzauva a ni a. Damdawiin hi RCC building niin chawng thum a ni a, pindan 67 a awm a. Hospital sakna atana a thlawna ram petutu te hi - Village Council/Court Thenzawl, Pi Thantluangi, Thenzawl leh Pu Hrangzuala, Thenzawl te an ni a, a ram zau zawng hi acre 40 vel  ni a. He Hospital sak hna enkawlturinhian Department in Thenzawl V/C leh NGO thenkhat te thawhpui ah siamin Vigilance Committee din a ni a, anni hian uluk takin a sak hna hi an vilin an enpui a ni.

Integrated AYUSH Hospital hi Resident Medical Officer 1 in thutchilhin Ayurveda leh Homeopathy doctor a pathum ve ve post an ni a, Staff Nurse 12 thawk mek an awm bawk a, doctor te tiamin thawktu zawng zawng hi mi 48 an ni.

Integrated AYUSH Hospital hi RCC building niin chawng thum sak a ni a, damlo 50 admit theih tura duan a ni a room hrang hrang 67 a awm a, cheng nuai 554.30 senga sak zawh a ni.Thawktu mi 48 awmin  chung zinga mi 7 chu doctor  (Homeopathy leh Ayurveda) a ni a, staff nurse 12 bakah thawktu dang an ni.

Nimin veka Thenzawla Chief Minister in a hawn Tribal Girls Hostel hi cheng nuai 359.83 senga sak niin a satu hi North East Consultancy Services niin turn key basis-a an siam leh sak a ni a. He building hi RCC building niin Mizo chhiara chawng thum a ni a. A building zau zawng belhkhawm hi square metre 1071 niin Dormitory lain 2 leh Dormitory dang 4 a awm a, henga hian thawl takin khum 75 awm thei tura ruahman a ni a. Building ah hian tui dah khawlna tanky(underground) litre 80,000 dawng siam a ni a.  Dormitory bakah Warden Room, Chowkidar room, Common Room, Dining Hall leh Kitchen te a awm bawk a ni.