No.2784/2021-2022
Aizawl, the 29th October, 2021 : Dr. R. Lalthangliana, Higher & Technical Education Minister chuan All Mask Campaign kal lai mek chu 15 November, 2021 thleng pawhsei a nih tur thu Mizo Students’ Union (MSU) General Conference vawi-19-na Chanmari YMA Hall a neih a hmanpuinaah a sawi.

Minister chuan Covid 19 hripui lengin khawvel a tuam mek a, he hripui hi Mizoram pawhin kan tuar nasa hle a. Amaherawhchu tlawmngai pawl hrang hrang leh kohhran, sorkar hnathawk leh mipuite thahnemngai takin Covid-19 do tur hian lungrual takin ke kan pen chhuak ho thei hi a ropuiin, he thawhhona hian min funkhawm tha em em a, Mizo nih a ti nuam tak zet a ni tiin, thahnemngai taka hripuido tura pen chhuak te chungah lawmthu kan sawi tak meuh a ni a ti. Vaccine lak pawimawh zia sawi langin, thalai kalkhawmte chu Vaccine la ngei tura fuihin, a tam thei ang berin vaccine an lak theih nana tan lak pui turin a sawm a ni.

Minister chuan tunlai Scholarship chungchanga harsatna sawi neuh neuh awm te pawh theih tawp chhuah a tan lak a ni a, Ministry of Tribal Affairs lam te pawh be pawpin lehkha leh Phone hmang te a umzui a ni a, tunah hian mithiam tirh thlak mek a ni a. Amaherawhchu Central lamah figure mis-match vang te, guideline an lo thlak vang te bakah, festival/hunpui lai a nih avangin tum ang tak chuan a kal chak thei rih lo a ni a ti.

Mizoram University Southern Campus atana hmalakna te sawiin, hei hi kan ram tan asset/rohlu pawimawh tak a ni tiin, Subject te pawh tunlai khawvel mil a siam a nih tur thu a sawi a. Zirlai te chu mahni dinhmun chhuanlama siam mai lova, tumruhna leh chhelna nen lehkha taima taka zir turin Minister chuan a fuih a ni. Mizo Students’ Union te chu ram leh hnam tana pawl thahnemngai tak an niin hnam thilah an tlanchhe ngai lo chu fakawm a ti a, kan in pumkhat a, kan in lungrual chuan hnamdang lakah kan zahawm a ni a ti a. Minister chuan Conference Souvenir-Kulva Magazine chu a tlangzarh bawk a ni.

Conference inkhawm hi Pu R.K. Hnuna, Vice President in a kaihruai a. Khual zahawm Pu Sakai Lian Luai leh Special Guest Pu L. Daniela EM, LADC te pawh in thusawina hun an hmang bawk. Chawhnu lamah Pu J. Lalmuanzuala, President, MSU kaihhruaiin rorel inkhawm neih chhunzawm nghal a ni.