No.2785/2021-2022

Aizawl 29th October 2021: Vawiin khan McCabe Hall, Aijal Club-ah All Secretaries, Government of Mizoram te chuan Chief Secretary Pu Lalnunmawia Chuaungo, IAS thlahna hun an hmang.

Chief Secretary Pu Lalnunmawia Chuaungo chuan thu sawiin amah thlahna hun tha tak buatsaih a ni chu lawmawm a tih thu a sawi a. Mizoram sawrkar hnathawkte taihmak leh thahnemngaihna te fakawm a ti a, thahnemngaih luatah midang rilru tih nat palh an awm chuan an hriatthiamna a ngen a.  Neitu tak tak rilru pu chung leh khawtlang nunphung leh kalphung hre reng chunga hnam tana thahnemngai taka thawk zel turin Secretary kalkhawmte chu chahin an kal zelna turah duhsakna a hlan a ni.

Addl. Chief Secretary Pu JC Ramthanga chuan thlahna thu sawiin Pu Lalnunmawia Chuaungo chu ram tana thahnemngai taka thawk mi, Mizopa taka ram leh hnam humhalhna kawnga mi tangkai tak leh Covid-19 hripui len vanglai leh hun harsa tak tak- ramri buai, Election, Bru repatriation process ah leh African Swine Fever len vanglai te a rilru fim takpu chung leh huaisen taka Zoram tana hmala thin a ni, a ti a. Mi tumruh, mi ze nghet tak nei, a kaihhruai leh thlazar hnuaia hnathawh nuam em em a ni tiin a kalzelna turah duhsakna sang ber kalkhawmte aiawhin a hlan a ni.

Vawiin tlai vek hian Chief Secretary Pu Lalnunmawia Chuaungo, IAS chuan Pu JC Ramthanga, IAS hnenah Chief Secretary charge a hlan nghal a, Pu JC Ramthanga hian a hna chelh lai bakah Chief Secretary hna hi a chelh rih dawn a ni.

 Programme hi P&E Commissioner & Secretary Pu H. Lalengmawia chuan a kaihruai a.  All Secretaries, Govt. of Mizoram leh Member of the IAS, AGMUT Cadre, Mizoram  ten chawimawina leh thlahna citation hlanna an nei bawk a ni.

Chief Secretary Pu Lalnunmawia Chuaungo hi IAS 1987 batch  (Gujarat Cadre) a ni a. Department pathum – Home, Political and Cabinet, Vigilance a enkawl mek a ni.