Vawiin khan Millenium Trade Centre Ground Floor ah Post Event te buatsaih 'Amateurs's Photographs Exhibition cum Sale' chu Pu Lal Thanzara, Parliamentary Secretary in a hmanpui. He Photographs exhibition hi Information & Public Relation Deptt, Environment & Forest Deptt, PHE Deptt, Photo House, Dawrpui, Homer Hardware, Dinthar leh NIKON  bultum ni in  thlalathiam 23 te'n  thlalak mawi tak tak 80 en tur leh lei nghal theih in an rawn pho chhuak.

Paliamentary Secretary chuan Post Event te hmalakna chu bengvar tlak hle in a hria a, Siamtu kutchhuak  mawi tak tak thlalak hmang a phochhuah chu Pathian chawimawina kawngkhat a nih thu a sawi. Thlalak mawi tak tak rawn phochhuaktu te chu talent(themthiamna) tha tak nei  te an ni a ti. Mihring nun a thlalak in pawimawhna a neih dan kawng hrang hrang  leh thlalakna in hma a sawn chhoh dan te a sawi a.Photography chi 4 - Amateur Photography, Adverstising photography, Journalistic Photography leh Documentary Photography chungchang te a sawi bawk.

He Exihibition buatsaihtu Post Event te chuan Mizo te chu  thlalak (photography) ah hma kan sawn hle tawh niin an sawi. Photographs Exhibition chu Thlalatu tih phurh nan leh tih hmasawn(promote) nan  kumtin buatsaih chhunzawm zel tha an ti bawk Thlalak pho chhuah te hi a hmunah pakhat Rs 1000/-(cheng sangkhat) zel in an zuar nghal a, thlalak pholan zing a 'mawiber' zawnna Viewers' choice poll result chu tun Inrinni lo awm turah puan an tum.

He intihsiakna a tel tum form  la chhuak mipa 49 leh hmeichhe 4 zing a mi 23 (mipa 19 leh hmeichhe 4) te'n  an thlalak 80 an rawn phochhuak a ni.