150/2024-2025 

Champhai, the 10th April, 2024: Indian Ambassador to Myanmar mawhphurhna chelh tura ruat, Ambassador-Designate to Myanmar Pu Abhay Thakur, IFS chuan zing dar 9:00 khan Circuit House Champhaiah District Official, NGO leh ramri behchhana sumdawngte meeting a neihpui a, ramri dep khua Zokhawthar a tlawh nghal bawk.

Ambassador-Designate to Myanmar Pu Abhay Thakur chuan Myanmar-a India ram palai hna a zawm hmaa a kaihhnawih mi pawimawh tak takte nena inkawmhona hun tha tak hmanho a ni chu lawmawm a tih thu sawiin, ram pahnih inkarah inlaichinna tha a awm theih nan kan zavaia tanrual a pawimawh a ni, a ti a. Security leh hmasawnna chu thil kalkawp tlat a nih avangin tun dinhmunah thil tih harsa rih mahse, nakin lawkah chuan ramri kaltlanga insumdawntawnna leh hmasawnna dangte pawh dan panggaia thawh leh theih a beisei thu a sawi a. Culture leh tourism chawisan kawnga thawhhona, inkalpawhna kawngpui siam leh hmasawnna ruhrel dangte pawh ngaihpawimawh a nih thu sawiin, ramri kaltlanga dan lova thil tih do kawngah theihtawp chhuah tlan a pawimawh thu a sawi a. Kalkhawmte chu zawh leh hriat duh an neihte bakah state leh central sawrkara thlen duh rawtna an neihte inthlahrung lova a hnena thlen turin a sawm a. Khawvel thang leh hmasawn zelah boruak inherdanglam dan thlir chunga hmalak dan tur tha ber ngaihtuahho a tul thu a sawi bawk.

He hun kaihruaitu District Bawrhsap Pu James Lalrinchhana chuan India ram aiawha Myanmara ram palai hna thawk mai tur Pu Abhay Thakur an Champhai District a tlawh chu District tana hun chhinchhiah tlak tak a nih thu sawiin, Champhai District mipui aiawhin thinlunng taka an lo lawm thu a sawi a. Champhai District chu ramri depa awm, district pawimawh tak a nih thu leh thenawm rambuai avangin refugee camp 23 a awm mek thu sawiin, sawrkar tha tichaktu NGO, Kohhran, pawl leh mimal tlawmngaite nen theihtawp chhuaha buaipui an nih thu a sawi a. Ruihhlo do leh ven kawngah pawh thawhhona tha tak neih a nih thu a sawi bawk a. Kalkhawmte inhmelhriattirna hun a hmang nghal bawk.

He hunah hian NGO te'n Free Movement Regime (FMR) tihtawp leh ramri hungte an do tlat thu an thlen a. Inkalpawhna kawngpui, raltlan chungchang, border trade, ramri kaltlanga ruihhlo tawlh ven chungchang leh pawimawh danga ngaihdan leh rawtna an neihte Ambassador-Designate to Myanmar hnenah hian an thlen bawk a ni.

Pu Abhay Thakur chuan meeting zawh hian Zokhawthar tlawhin ramri kaltlanga insumdawntawnna leh hemi kawnga hmalaknate enfiahin a zirchiang a. Land Custom Station Zokhawthar, Immigration Check Post leh Assam Rifles COB Zokhawtharte a tlawh a, hemi hnu hian Aizawl panin a let leh a ni.

Ambassador-Designate to Myanmar Pu Abhay Thakur hi Pu Thomas Zodingliana, DIG (Eastern Range), Pu Lalthiamsanga Sailo, Jt. Secretary  (Home), Pu James Lalrinchhana, DC Champhai, Pu Vineet Kumar, SP Champhai, Pu K. Laltlawmlova, State Protocol Officer, Pu K.  Zorammuana, Addl. DC Champhai, Pu Ronald Lalchhuanawma, Dy. Director, Commerce & Industries Department, Customs hotute leh Official dangte'n an tawiawm a ni.