3303/2022-2023
Aizawl, the 19th January 2023 : Vawiin khan Sub Committee on Overall Coordination on G20 meeting chuan Aizawl Municipal Corporation (AMC) Mayor Pu Lalrinenga Sailo leh a thawpui Councillors te chu Mizoramin G20 Business Meeting March ni 2 a, a thlen tur chungchanga inhrilhhriatna hun AMC Office ah an nei.

He Sub Committee a Member Secretary Pu David H. Lalthangliana, OSD-cum-Joint Secretary chuan G20 Business Meeting pawimawh dan chungchangte, Mizoramin he meeting a thlen tur inpuahchahna lo kalpui tawh te chungchangte leh ruahmanna hrang hrang lo duan chin chungchangte sawiin heng zawng zawngah hian AMC thawhpuina leh tawiawmna kan mamawh dawn a. a ti a. A bik takin ram dang delegates meeting a tel tura lokal ten Mizoram hi state fai tak, state nuam leh mipui hawihawm tak min tih leh hmuh thei nan, an kalna tur hmun hma te fai taka kan vawn leh lo enkawl te, bawlhhlawh kan thlahdah lohte, hawihawm taka kan lo dawnsawn te a pawimawh dawn a, chuvangin Local Council te thlengin a pawimawh dan hi an hriat a tul hle a ni, a ti.

AMC Mayor Pu Lalrinenga chuan G20 meeting Aizawl ah hlawhtling taka neih theih nan AMC chuan a tul tul a ti dawn tiin hemi kawnga a buaipuitu a bik takin Home Department leh Sub-Committee hrang hrang te chuan AMC finchhuah turin leh a tul apianga amah leh Councillor zawng zawngte chu an in hawn reng thu a sawi.

Tarlang tawh thin angin Mizoram hian G20 Business Meeting hi March ni 2 khian a thleng dawn a. Aizawl tiamin Hmarchhak khawpui hrang hrangah G20 meeting chi hrang hrang tum 14 neih a ni dawn a, hengte February leh April inkar ah te neih tura ruahman a ni. Assam leh Sikkim tih lo chu Hmarchhak state dangte hian tum khat vek G20 meeting an thleng dawn a, Assam in meeting 4 leh Sikkim in meeting 2 an thleng bik dawn a ni.