3304/2022-2023
Lunglei the 19th January' 2023: Vawiin chawhnu khan Govt. High School Lunglei chuan Platinum Jubilee (75 Years) lawmna hun School kawtzawl ah hman a ni. Dr L. Thangmawia MLA leh Vice Chairman Human Resources Development Board. Govt. of Mizoram nibawk chuan khuallian niin a hmanpui a, Dr H. Lalthlangliana, Director, School Education chu khualzahawm a ni.

Platinum Jubilee lawmna inkhawm hi Pu F. Lalhmangaihsanga, Head Master, Govt. High School, Lunglei chuan kaihruaiin khuallian Dr L. Thangmawia chuan Govt. High School, Lunglei in Platinum Jubilee a thleng thei chu lawmawm a ti a. Govt. High School hi kum 1948 ah Mizoram a zirna lama meichher chhitu ni tura din a lo ni a. He School din nan hian Lunglei a nu leh pa tam tak ten an rilru an sen a ring a, He School atang hian ram tan mi hlawthling tam tak Union Minister, Minister, Dy. Speaker, MLA, IAS, IPS IES, MCS , Engineer te leh officer bakah Pastor tam tak lo hlawhtlin pui tu a ni a ti a. Tuna zirlai te hi mi hlawhtling te aia ropui in ni thei a, khawvel thiamna a sang a chumi el pha tur chuan zirlai te an pawimawh a, taimakna leh tumruhna nen tan la turin zirlai leh zirtirtu te a fuih bawk. Education hi mihring te tana pawimawh ber pakhat ani a, zirna piah lama mihring siam tha tu a ni a ti a. Zirna in hma a sawn theih nan sorkar in theitawp a chhuah a, zirtirtu kumtin pensiona chhuak an tam a hemi hnawhkhah nan zirtirtu 157 lak tur kalpui mek a ni a ti a, MR teacher 880, Regular teacher 152 leh Hindi teacher 818 lak anih tawh thu a sawi bawk.

Khualzahawm Dr H. Lalthlangliana, Director School Education pawh in thusawiin chhimbiala School tha leh hlu thil zawng zawng siam chhuahna School tha tak a ni a ti a, Politician Officer, Pastor leh sumdawng lo chherchhuahna anih avangin Lunglei tan chauh nilo Mizoram pum tan a hlu a ni a ti. He School atang hian zirlai tam tak zirtirtu thiam tak tak te kaihhruaina in top 10 ah an chuak theih a ni a ti bawk. Zirlai leh zirtirtu te tunlai thiamna mila tangkai tak a hmang tur in a duh a ni.

Govt High School hi Sap Missionaries HV Carter, RF. Tucker te bakah Pu Lalmama Headmaster M.E School Serkawn leh Pu C.Saizawna te hmalakna in kum 1948 khan Govt College Office building awm naah khuan a ding a. Date 01.06.1954 ah Lunglei High School chu Provincialise a ni a. Kum 1962 ah Chanmari Lunglei ah School Building sak tan niin Date 29.11.1963 ah luah luh a ni. Govt High School Lunglei ah hian Headmaster leh zirtirtu 17 leh thawktu dang pa 4 awm mekin an vai in thawktu hi mi 22 an awm a ni. Kum 2022-2023 ah Class IX zirlai 152, Class X zirlai 196 an awm mek bawk a ni. Khuallian Dr. L. Thangmawia hian kum 1989 khan Govt High School atangin Class X Exam ah Mizoram pumah 5th na niin Mathematics subject ah topper a ni.