3305/2022-2023
Aizawl, 19th January, 2023 : Vawiin khan State Task Force Committee for Immunization chu Committee Chairman Pi Esther Lalruatkimi IRS, Principal Secretary, Health & Family Welfare Department hovin a office ah an thu khawm a. Natna hrang hrang laka invenna, Immunization programme kalpui mek te leh Mizoram dinhmun te, programme thar kalpui leh turte nen an thlir ho va. Heng zingah hian kumin 2023 January ni 1 atanga kalpui mek zenghri danna, fIPV(fraction Inactivated Polio VaccinE) te; December 2023 ral hma a sentut natna, Measles Rubella tirem tura sawrkar laipui hmalakna kalpui dan tur te; hmeichhe tam tak natna leh thihna thlen thintu chhulhmawr cancer venna, Human Papilloma Virus Vaccine pek chhuah dan tur leh, Covid Vaccine bakah Vaccine dang late chhinchhiahna tur U-WIN platform Aizawl leh Lawngtlai district a kalpui chhin dan tur chungchangte sawiho a ni.

State Task Force Committee Chairman Pi Estheri chuan natna laka invenna tur Immunization Programme te chu Mizoram tan leh thangthar lo awm leh turte tan a pawimawh zia sawiin Immunization programme hrang hrangte chu hlawthling taka kalpui turin Health & Family Welfare departmentin mal khai chi a ni lo, a ti a. Department hrang hrangte nena thawh hona tha neih a pawimawh thu sawiin hemi kawngah hian State Task Force Committee a tel Education Department te, Women & Child Development leh Information &Public Relations Department te bakah MHIP te chu thahnemngai taka hma lakpui turin a sawm a ni.

Kum 2014 atang khan India ram chu zenghri laka fihlim tawha puan a ni chungin thenawm ram atangte a natna hri lo lut thei a nih avangin Polio vaccine hi tha taka pek chhunzawm zel a pawimawh a. Ministry of Health & Family Welfare thu chhuah angin January 1 atang khan India ram pumah fIPV hi dose 3 a pek tan a ni tawh a. Naupangin thla 9 a tlinin fIPV hi Sentut venna(Measles Rubella Vaccine) lak rualin pek atur a ni a. Dose 3 lakin zenghri lakah za a 98% a veng tura ngaih a ni.

Prime Minister Pu Narendra Modi-an December 2023 ah India rama Sentut natna, Measles Rubella tirem tura hma lak a lo tiam tawh angin state tinah he natna laka invenna vaccine hi district tinah naupang za zela 95% hnenah 1st leh 2nd dose pek vek tur a ni a. Naupang kum 5 la pumhlum lo ten vaccine hi dose 2 an la ngei tur a ni.

Khawvel pumah India ram hi hmeichhe chhul-hmawr cancer tamna ber pahnihna a ni a. Chhul-hmawr cancer tam ber chu Human Papilloma Virus vang a ni tih hmuh chhuah niin hei hi vaccine hmanga ven theih leh, hei hian za zela 99.9% a veng tih hriat a ni a. India sawrkar chuan kum 2023-24 atang hian hmeichhe naupang/tleirawl kum 9 atanga kum 14 inkar tan Vaccine hi a thlawnin a pe dawn a. He vaccine single dose kalpui hmasakna tur state 7 thlan chhuah zingah Mizoram chu telin Health & Family Welfare Department chuan mi sing 6 vel tinzawnin ruahmanna kalpui tum a ni.