3306/2022-2023

Aizawl 19th January, 2023: MP(LS) Pu C.Lalrosanga chu Parliamentary Standing Committee on Health and Family Welfare member dangte nen study tour neiin khawpui hrang hrang an tlawh kual mek a. Rilru hriselna leh TB veite enkawlna lama hmalakna hrang hrangte enin hetiang enkawlna lama hnathawk state leh central sorkar hotute an kawm zel bawk.

Pu C.Lalrosanga hian Pathianni khan Arunachal Pradesh leh Assam inrina hrula Karbi hnam zingah rawngbawlna hun a hman hnuin thawhlehni khan Tezpur a Lokpriya Bordoloi Regional Institute of Mental Health-ah Parliamentary Standing Committee on Health and Family Welfare member dangte nen rilru lama harsatna neite enkawl dan leh hemi kawnga he institute hotute bakah, state sorkar leh central sorkar hmalakna te an zirchiang a. An committee ṭhutkhawmnaah Pu Rosanga chuan tun hmaa Tezpur Asylum ti a mi â dahkhawmna anga hriat ṭhin he regional institute hi hmarchhak bial state dangte pawhin an chhawr ṭangkai zawk theihna tura tihphuisui zel a ṭul thu a sawi a. He institute a course hrang hrang zirtirnaah hmarchhak zirlai tam zawk lakluh a ṭul thu a sawi bawk.

MP rualte hian nimin January ni 18 khan Guwahati a AIIMS tlawhin committee ṭhutkhawmna an nei nghal a. Hmarchhak biala damlote mamawh phuhru thei tur khawpa AIIMS hi tihphuisui a ṭul an ti tlang a ni. Vawiin khan Guwahati ah Assam sawrkar hotute kawmin Prime Minister's TB Mukt Bharat Abhiyan leh Mental Health Management and Care chungchangte an sawipuii a, hemi zawh veleh hian Kolkata an pan nghal a ni.

Kolkata ah hian West Bengal sorkar hotute nen ṭhukhawmin hriselna lama an hmalak dante an sawipui a. UCO Bank leh Coal India hotute kawmin Parliamentary Committee chuan an hmalaknate an zawtfiah nghal bawk.

January ni 15 khan Guwahati leh Itanagar inkara Fly Big Airlines thlawhna thlawk hmasaberah chuangin Pu C.Lalrosanga chuan an Airlines Managing Director nen Aizawla Fly Big service siam chungchang an sawidun a. Aizawl leh Imphal bakah Aizawl leh Shillong inkara Fly Big service tir chungchang an Director of Corporate Affairs a sawipui bawk.

Heng MP rualte hian an study tour chungchang hi Parliament ah report an la pe leh dawn a ni.

Attachment

  • Loading attachment...