3649/2023-2024

Aizawl, 5nd Feb 2023: Aizawl Municipal Corporation (AMC) chuan insak phallohna hmun (Protected Area)-a in sa lui Pu Lalramsanga chu a insak thiat turin a hriattir a. Dan zawm loa insa leh lei lai nia hriat te chungah pawh hma a la mek.

Er. Lalhriatpuia, Municipal Commissioner chuan 31st January 2024 khan In thiat tura hriattirna (Demolition Order) tichhuakin, in sak phal lohna hmuna Sawrkar-in a puan, Bawngkawn - Durtlang Road-a in sa lui Pu Lalramsanga chu a insak thiat nghal turin a hriattir a ni. Demolition Order-ah hian Pu Lalramsanga hi 29th March 2024 hmaa a in thiat zo turin hriattir a ni a, thupek a zawm loh chuan AMC-in a thiah sak theih thu leh, a thiah man senso chu Pu Lalramsanga’n dan anga a chawi a ngaih tur thu hriattir a ni bawk.

12th July 2023 khan Pu Lalramsanga hi phalna nei lova Protected Area-a in a sak chhan sawifiahna hun pek a lo ni tawh a, a insawifiahna hi AMC chuan thu tlingah a pawm sak lova. A in thiah a nih loh chhan tur sawifiah turin 25th October 2023 khan show cause notice pek a ni leh a, notice hi a chhang ta lo a ni.

Bawngkawn - Durtlang Road a Protected Area hi Aizawl Master Plan Vision - 2030 anga puan a ni a. Aizawl khawpui hi chenna nuam taka siam tur leh kan in leh lo te a him zawkna tura AMC hmalakna hi khauh taka kenkawh zel tum a ni a. AMC chuan dan loa lei lai leh insa mek nia langte pawh endik zelin an chungthu ngaihtuah zel a tum a ni.

Aizawl khawpuia cheng mi tam zawk ten AMC Building Regulation hi an ngai pawimawh viau tawh a. Dan zawmah mipui ten hma kan sawnin Building Regulation bawhchhia te pawhin AMC hmalakna hriattir an nihin an lo ngai pawimawh thiam sawt hle a, in thiah then ngai te pawh an thiat mai thin a. Chutihrualin dan zawm tum lo emaw, nachang la hre lo mi tlemte la awm te pawh hian AMC Building Regulations te hi kan khawpui him zawknan leh a lo nawm zawkna turin ngai pawimawh thar ila a duhawm hle a ni.