3648/2023-2024

Dated the 3rd February, 2024: Vawiin khan Chief Minister Pu Lalduhoma chuan Kulikawn Hospital building thar leh a kaihhnawih building thar te sakna tur hmun a tlawh a. Pi Lalrinpuii, Health Minister leh Pu Lalchhuanthanga, bialtu MLA ten an tawiawm.

Deputy Medical Superintendent Room a inkawmna buatsaihah thusawiin Chief Minister chuan, Kulikawn Hospital complex thar sak a nih theih nana bialtu MLA thahnemngaihna a fak a, term hmasa atang tawhin a bei a, house ah te a sawi chhuak a. Mipuiin kan mamawhzia a hriaa, a vei em em thin. Health Minister pawhin a pawimawhzia hriain theihtawp a lo chhuah bawk a, tunah a bul kan lo tan thei dawn ta a ni. Hun reilote chauh sawrkarna kan la kalpui a, hetih chhunga Health Minister hmalaknate hi a chhuanawm hlawm hle a ni. Aizawl Civil Hospital-in min dawl zo tawh lo hle a, ZMC hi mi nawlpui tan a lam a lo hla deuh bawk a, Kulikawn Hospital hmunhma hi a lo zauvin a lo rem hle mai nen, sawrkar chuan he hmunah hian khum 100 awm theihna Hospital thar sak kan tum ta a ni. Hospital building zau zawng hi 4559.25 sqm a zau a ni ang a, a kianga Type 4 quarters block pakhat, unit 6 awm leh Type 3 quarters block 2, unit 12 awm thei tur te, Type 2 quarters block pahnih, unit 6 nei thei turte leh tul dangte dah kan tum dawn a. Hna te tha taka thawh a niha, a hun tak zawh a nih theih nan thawktuten theihtawp in lo chhuah dawn nia, tiin a chah a ni. Chief Minister chuan, sawrkar tharah mipuiten beiseina thar an nei lian a, damna a thleng mek a, sawrkar hnathawkte pawh an phur a, hna tha thawk turin an inpeih at vek a ni. Chu chu hriain sawrkar pawhin theihtawp a chhuah dawn a, ram rawngbawlna hi Pathian rawngbawlna ropui tak a ni tih hre chungin hma kan la dawn a ni, a ti.

Health Minister Pi Lalrinpuii pawhin thusawiin, thingtlang lama chengten inentir tura Aizawl an pan nasat avangi Aizawl Civil Hospital leh ZMC te a lun em em mai a. Hemi tiziawm tur leh lam hnai zawka inentirna tha an hmuh theih nan District Hospital te kan thuam tha chho mek a. Thawktute pawh a tul angin kan siamrem dawn a ni, a ti a. Ruahmanna dang an neih te pawh a tarlang a ni.

Kulikawn Hospital Complex thar hi Ministey of DoNER scheme NESIDS sum Rs 67.63 Crore hmanga thawh tur a ruahman a ni.

He hunah hian Dr. Renu Sharma, Chief Secretary leh Health Department, Planning leh PWD officials pawimawh te an tel a ni.