3647/2023-2024

2024 Ramtuk thla ni 3: Photo Electoral Roll Special Summary Revision 2024 neih mek chungchangah vawiin khan Electoral Roll Observer Dr Lalzirmawia Chhangte, Secretary, School Education Department chuan Kolasib tlawhin, election official-te meeting a neihpui.

Kolasib DC Conference Hall-a photo electoral roll special summary revision 2024 chungchang meeting-ah Dr Lalzirmawia Chhangte chuan SSR kalpui meka final electoral roll chu MP Inthlanpuia hman tur a nih avangin a pawimawh hle tih a sawi a. MLA Inthlanpui 2023 neih zawh takah electoral roll leh inthlan kalpui dan felfai leh thianghlim tak a awm tih sawiin, tun ṭumah pawh electoral roll felfai leh hrisel zawk a awm ngei a beisei thu a sawi a. A hun taka final electoral roll rin tlak tak tihchhuah a nih theih nan official-te chu theih tawp chhuah turin a chah a ni.

Electoral Roll Observer hova meeting-ah hian Kolasib District Election Officer Pu John LT Sanga chuan Kolasib District chhunga draft electoral roll dinhmun leh special summary revision neih meka hma lakna tlangpui a sawifiah a. He hunah hian Electoral Roll Observer chuan Kolasib District-a SSR 2024 kalpui meka lehkha pawimawh en fel ngaite a en fel nghal bawk a ni.

Special Summary Revision, 2024 kalpui mekah hian draft electoral roll chu January 6, 2024 khan tihchhuah niin, Kolasib District-a assembly bial pathum - Tuirial, Kolasib leh Serluiah vote nei mipa 30,594 leh hmeichhia 32,861, an vaiin mi 63,455 an awm a. India khua leh tui kum 18 tling chin, January ni 1, 2006 leh a hma lama piang electoral roll-a inziah luh thar, paih, insawn leh siam ṭhat duhte tana January ni 22, 2024 thleng hun hawnah dilna (Form 6, Form 7 leh Form 8) 2,226 a lut a. February ni 8, 2024-ah hian final electoral roll chu tar chhuah tura ruahman a ni.