3646/2023-2024

Champhai the 3rd February, 2024 - Er. H. Ginzalala, Champhai North Bialtu MLA, Adviser to CM ni bawk chuan nimin khan Champhaia Sawrkar Department hrang hranga head of office-te a kawm.

Er. H. Ginzalala chuan Champhai District in hma a sawn theihna turin official-te chu an theihna kawngah theuh thurawn pe tur leh an thahnem ngaihna te awmze nei zawka an kalpui theihna tura finchhuah thin turin  a ngen a.  Sawkar hnathawkten thil tum inang nei mahse kalpui dan a darh thin avangin hmasawnna a kal chak mawh thin tih a sawi a,  ram in awmze nei zawka hma a sawn theihna turin thawhhona tha zawk an mamawh tih sawiin, Department hrang hrangten an remhriatna an thawhkhawm thiam phawt chuan hmasawnna a chak lo thei lo, a ti. Champhai District in hmasawnna kawng kan zawh chu khawtlang tan a tha tur a ni a, ram economy leh environment tan a tha ngei ngei tur a ni, a ti a, heng te tel lova hmasawnna kawng kan zawh chuan a hlawhtling tak tak thei lo, a ti a ni.

He hun hi Circuit House ah hman niin Pu M. Misael, Addl. DC, Champhai chuan a kaihruai a, sawrkar Department hrang hranga head of office te'n zawhna leh sawi duh an neih te MLA hian a ngaihthlak sak a ni.