No.2521/2021-2022
Aizawl, 17th October, 2021 : PM CARES hnuaia Mizoram sawrkarin a dawn 1000 LPM Oxygen Plant, SRHF-ZMC a mi chu vawiin khan AMC Mayor Pu Lalrinenga Sailo-i’n ribbon chep chatin a hawng.

Oxygen plant hawn puala inkhawm Lecture Theatre-I a buatsaihah AMC Mayor Pu Lalrinenga Sailo chuan ZMC in Oxygen Plant 200 LPM kan neih sa tangkai taka kan hman bakah a aia lian zawk PM CARES hnuaiah 300 LPM Health Minister Dr. R. lalthangliana’n thla kalta khan a hawng tawh a, chumi hnuah PM CARES hnuaiah tho oxygen plant lian lehzual 1000 LPM vawiin kan hawng leh ta hi Zoram tan thil lawmawm leh chhinchhiah tlak a ni, a ti a. Prime Minister in vawiin khan delhi atangin India ram State hrang hranga PM cares hnuaia oxygen plant bun te a hawng tawh a, hetih rual tho hian Aizawla damdawi in pahnih Kulikawn Hospital leh Zemabawk Cancer Hospital bakah District Hospital hrang hrangah oxygen plant hi hawn a ni bawk a ni, a ti a. COVID-19m hripuiin nasa taka min sawp karah bungrua leh hmanraw dang kan neih loh tam tak kan han nei thung a ti a, hengte hi damlo ten dam nan an hman ngei a duhsak thu a sawi a ni.

AMC Mayor-in vawiina a hawn tak Oxygen Plant 1000 LPM hi PM CARES Fund ( Citizen Assistance and Relief in Emergency Situation) atangin Covid 19 second wave dona atan DefenceResearch & Development Organisation (DRDO) atangin dawn a ni a. A khawl dahna tur in hi Central PWD in an rawn sa a ni.

Oxygen Plant hi TATA Engineers in an rawn bun a, October ni 3, 2021 khan an zo fel a ni. Khawl bun zawh fel veleh hian enchhinna ‘test run’ neih nghal niin, final test run hi nimin October ni 6, 2021 khan neih a ni a, oxygen thianghlimna (O2 purity) pawh 90% aia tam a ni tih finfiah a ni. Oxygen Plant tinung tur hian 500 kva transformer hman niin , 500 kve Deisel generator a back up pek a ni bawk.

He khawl hi TATA ADVANCED SYSTEMS LIMITED, Bangalore te siam niin, a model hi TATA 02 960 ani a. Minute khata oxygen a pek chhuah theih zat hi 1000 litres niin darkar 24 chhungin 14,40,000 litres a pe chhuak thei a, a thianghlim zawng hi 93 – 95% a ni ang. Pressure hi 4.5 bar thleng a pe chhuak thei a, chumi chuan pipeline ah kal tirin lutin damlo ten an mamawh angin an khumah an lo la thei dawn a ni.

Vawiina Oxygen Plant hawnna inkhawm hi SRHF-ZMC Director Dr John Zohmingthanga’n a kaihruai a, Dr. Micky Zodinpuia, Nodal Officer, Oxygen Plant-in technical report pe in, Dr H.C. Laldina, Medical Superintendent, SRHF-ZMC in lawmthu sawina hun a hmang a ni.