No.2520/2021-2022
Aizawl 07.10.2021: Chief Minister Pu Zoramthanga chuan vawiin khan Mizoram State Cancer Institute (MSCI), Zemabawkah PM Cares kaltanga sawrkar laipui atanga dawn PSA (Pressure Swing Adsorption) Oxygen Plant chu hman theihin a hawng. PM Cares kaltlang hian India ram state hrang hrangah PSA Oxygen Plant din leh bun te hawnna inkhawm neih niin, AIIMS Rishikesh, Uttarakhand ah Prime Minister Pu Narendra Modi chuan oxygen plant 35 hawngin, hemi rual hian hmun hrang hrangah oxygen plant hawnna inkhawm neih a ni.

Chief Minister chuan oxygen plant tha tak state cancer institute-ah leh Mizoram hmun hrang hrangah hawn a ni chu lawmawm a ti a. Tunlai COVID-19 hrileng avang mai bakah natna hrang hrang avanga damlo te tan oxygen an mamawh khawp pek mai tur awlsam taka siamna tur hospital-ah kan nei ta chu hlu a tih thu a sawi.

H&FW Principal Director Pu F. Lallianhlira he hunah hian thu sawiin, hun kaihruaitu Dr. Zoramthanga, Director, MSCI chu report tawi a pe nghal a. MSCI a oxygen plant bun hi 1000 LPM plant capacity niin, India ram district tina oxygen plant pakhat tal dah tura sawrkar laipui ruahmanna niin, Mizoramah chuan oxygen plant 13 dawn a ni.

Vawiin programme-a hian AMC Councillor (Ward VII) Pu Vanlalneia; Aizawl DC Dr. Lalhriatzuali Ralte leh H&FW Secretariat a hotute bakah khawtlang hruaitu thenkhat an tel a ni.