No.2519/2021-2022
Aizawl, the 7th October, 2021: Project Management Unit (PMU) FOCUS Project, Aizawl leh A.H & Vety. Department Champhai tangkawp buatsaihin vawiin khan FOCUS Project hamthatna dawngtu Undivided Champhai District-a Vawk vulhtute tan Silage siam inzirtirna neih a ni a, ran chaw chan sawmna khawl semchhuah a ni bawk. A hawnna hun DVO Pisa tuala neih hi District Bawrhsap Pi Maria C.T Zuali chuan khuallian niin a hmanpui a, FOCUS Project hamthatna dawngtu mi 18 te hnenah ran chaw channa khawl Chaff Cutter a hlan a ni.

Khuallian Pi Maria C.T Zuali chuan Vawk vulhtute tana ran chaw Silage siam inzirtirna buatsaih a ni leh ran chaw chan sawmna sem a ni chu a lawmawm a tih thu a sawi a. Champhai District chu Vawk vulh tamna leh intodelh thei khawpa theihna nei a nih thu sawiin, Vawk hrileng African Swine Fever laka him tlan nan theihtawp chhuah a nih thu sawiin, tantlanna avang chauha Champhai District a him rih thu leh Vawk hri lenna hmunte khuahkhirh a nih thu a sawi a. African Swine Fever bakah Food & Mouth Disease leng laka fihlim nan khapna order siama hman mek a nih thu a sawi bawk.

Sa hring mai nilo sawngbawl hnua ei tur dang siam leh zawrhsuma chang thei buatsaih kawngah tanlaka hmasawn a ngaih thu sawiin, Vawk vulhtute chu thil tihna reng rengah theihtawp chhuah a bei hram hram tur leh hlawkpui tham vawk vulh turin a chah a. Thawhrimna Pathianin mal a sawm thin thu sawiin, sawrkarin hmanrua a pekte neitu nihna thinlung pua enkawl thin turin a fuih a. Cooperative Society dina hamthatna awm angte a theihna zawnah ngaihven zel tum a ni, a ti a. Ran vulha eizawngte chu Vawksa mai bakah sa dangahte Mizoram chawmtu ni thei tura tanlak puiah a sawm a. Hnathawh zak lova hmasawnna tura taima taka bei thin turin a chah bawk.

He hun hi Dr. B. Zonghinga, DVO Champhai chuan a kaihhruai a. Dr. Lalrotluanga Sailo, Deputy Director (A.H. & Veterinary Department), PMU FOCUS, Aizawl leh Pu MS Dawngliana DPM, FOCUS Champhai-te hnen atangin thusawi ngaihthlak a ni bawk. Dr. Vanlalhluna, AHM, D.V.O Office, Champhaiin lawmthu sawiin hun a khar a. Hemi hnu hian silage siam dan a thu leh a takin zir a ni.