No.2518/2021-2022
Aizawl Khuangchawi thla ni 7, 2021: Prime Minister's Citizen Assistance and Relief in Emergency Situations (PM-CARES) Fund atanga District Hospital Lawngtlaia bun, minute khat chhunga oxygen litre 250 siam chhuak thei, Pressure Swing Adsorption (PSA) Oxygen Plant chu vawiin khan Lai Autonomous District Council (LADC)-a Chief Executive Member (CEM) Pu V. Zirsanga'n a hawng.

Pu V. Zirsanga chuan Pathianin oxygen mamawh turin mihring a siam a, kan mamawh anga hip luh tur oxygen pawh boruakah a dah laiin, thawk lama harsatna nei leh damlo na zualte chuan khawl hmanga oxygen siam chawp hip an mamawh thin tih sawiin, District Hospital Lawngtlaia oxygen siam chhuahna khawl bun a ni leh hman theiha hawn a ni ta chu District tan rahbi thar rahna a ni tih a sawi a. District mipuite'n an la chhawr tangkai zel tur a nih avangin a hlutna pawh a pung deuh deuh dawn a ni, a ti. District Hospital Lawngtlaia Oxygen Plant buatsaih leh hawn theiha peih fel a nih nana tha thawhtu leh thawktute inpekna fakin, tha tak leh tluang taka hman a nih zel theih nan thawktute leh District mipuite theih tawpa tang tlang zel turin a chah a ni.

District Hospital Lawngtlaia 250 LPM PSA Oxygen Plant hawnna inkhawm hi Lawngtlai Additional Deputy Commissioner Pu James Miahlung chuan a kaihruai a. Lawngtlai Bawrhsap Dr Andrew H. Vanlaldika'n inlawmna thu sawiin, District Hospital Lawngtlai (DHL)-a District Medical Superintendent Dr Zothanpari Chhakchhuak chuan technical report a pe a. DHL-a Medical Officer Dr Paul Lalchungnunga'n lawm thu a sawi a ni.

DHL-a PSA Oxygen Plant bunna tur in (plant house) hi Zamzo Construction Farm te'n August ni 4, 2021 atang khan an buatsaih tan a. October ni 3 khan a khawl hi lak luh niin, Engineer-te'n an rem khawm a, en chhinna te kalpui a nih hnuah, October ni 6 zan dar 11-ah a nih dan tur taka hman theihin buatsaih fel a ni a. He plant atana mamawh 250 KVA Transformer chu September ni 24 leh October ni 3 inkar chhung khan P&E Department, Lawngtlai Power Division te'n an bun fel bawk a ni.

Hospital chhung hmun 43 - inzaina pindan (operation theatre) leh ward hrang hrangah te oxygen herh chhuahna hi siam niin, COVID-19 vanga damlo na zual, Dedicated Covid Health Centre (DCHC)-a enkawl mekte tan hmun 8-ah outlet hi dah tel a ni bawk a. A tul angin hman nghal a ni dawn a ni.