No.2517/2021-2022
Aizawl, 7th October, 2021 : Vawiin chawhma khan Guwahati ah '11th Meeting of High powered Review Board of Brahmaputra Board' chu Union Jal Shakti Minister Pu Gajendra Singh Shekhawat kaihhruaina hnuaiah neih a ni a. India hmarchhak state hrang hrang atangin member-te an kalkhawm a ni.

He meeting-ah hian Pu L.Thangmawia chuan Mizoram tui hmuhna hnar pawimawh te chu ruahtui (rain water), lei hnuai tui (ground water) leh lui (river) te an ni a, tun dinhmunah rain water harvesting lamah tan lak a la ngaih thu leh sawrkar laipuiin Mizoram Sawrkar ruahmanna te a tihhlawhtlin sak a tul thu a sawi a. Tuna Mizoram tuilakna pawimawh tak pakhat ground water lamah pawh Mizoram Sawrkarin work plan 2019-22 leh 2022-24 atana cheng nuai 21793.50 a siam pawh sawrkar laipuiin lo ngai pawimawh se a duh thu a sawi a ni.

Mizoram chhunga an hmalakna hrang hrang avangin Jal Shakti Ministry thuneitute hnenah Pu L.Thangmawia chuan lawmthu a sawi a. Tuna Mizoram leh state hrang hrangin kan mamawh chu tuihna humhalh a ni tiin Mizoram sawrkar pawhin CYMA te nena thawk hovin inzirtirna leh a theih anga hmalakna a kal pui mek a ni, a ti. Brahmaputra Board chuan Mizorama lui hrang hrangte humhalh leh tangkai zawka hman kawngah hma rawn la ve se a duh thu a sawi a. Hetiang kawnga hmalak a nih loh chuan tui lakna project leh khawl tha tak tak awm mahse, hun lo kal zel turah mipui mamawh tawk tui lak tur a awm lo thei dawn a ni, a ti bawk.

Mizorama lui sei ber, Tlawng lui chu Mizoram nunna hnar pakhat a nih thu sawilangin Pu L Thangmawia chuan PHE Department-in Rejuvenation, Protection and Management of Tlawng River tih concept an siam chu Brahmaputra Board atangin emaw, Jal Shakti Ministry atangin emaw tihhlawhtlin sak ngei a tul thu a sawi lang bawk a ni.

He meetingah hian Pu L.Thangmawia hi Dr Malsawmtluanga Fanchun, DRC Guwahati in a tawiawm a ni.

Attachment

  • Loading attachment...