No.2516/2021-2022
Aizawl, 7th October, 2021 : Faina Hapta “Cleanliness Week, 2021 (2.10.2021 – 8.10.2021)” hman mek denchhenin Directorate of Urban Development & Poverty Alleviation a thawkten an Director Pu H. Lianzela hovin vawiin khan faina hnatlang an nei a, an Directorate Office building leh a chhehvel bakah an office panna kawng dung an tifai a ni.

Chawhma dar 11:30 khan hnatlang hawnna Directorate kawt zawlah neih niin, faina kawnga theihtawp chhuaha hma la tur intiamna thu an chham rual a ni. Hnatlang hawngtu Pu H. Lianzela chuan sawrkarin Department hrang hrangte hnathawh tur chanpual a ruahmanah UD&PA chu khawpui faina kawngah mawhphurhna pek kan nih avangin khawpui fai leh fai loh hi kan hnathawh that leh that loh tehfung pawimawh tak pakhat a ni a, India rama State fai, mawi, thianghlim leh hlu ber ni turin faina meichher kengtu kan ni theuh a ni tih kan hriat a pawimawh a ni, a ti a. Faina Hapta naktuka khar a nih tur thu sawiin hemi denchhen hian mipui huap ruahmanna siam a ni a ti a, mimal leh pawl angin emaw faina kawnga an hmalakna chi hrang hrangte anmahni social media handles hrang hrang – facebook, twitter, instagram, whatsapp etc., ah uar taka phochhuak turin mi zawng zawng a sawm a ni.

Swachh Bharat Mission (Urban), Mizoramin a huam chin khaw 23 te chu kum 2017 khan Open Defecation Free (pawn lera inthiarna awmlohna) a puan vek kan nih tawh thu sawiin Pu H.Lianzela chuan tunah hian ODF+ ni turin tan kan la mek a, endik tawh chinah ODF+ tling zo khawpui kan la nei lova, tan kan lak nasat a la ngai hle a, a bik takin vantlang inthiarna (public toilet/urinals) vawn fai kawngah nasa taka kan harh thar a pawimawh a ni,a ti.

Faina Hapta, 2021 (2.10.2021 – 8.10.2021) hi October ni 2, 2021 khan Deputy Chief Minister, UD&PA Minister ni bawk Pu Tawnluia’n a hawng a, hemi rual hian Mizoram chhunga khawpui dang 28 ah he hapta hi hawn a ni bawk a ni. Faina Hapta chhungah hian UD&PA Department chuan “Faina – kan in leh a chhehvel atangin” tih thupuia hmangin kawng hrang hranga ruahmanna siamin hma an la a, media hrang hrang kaltlangin faina kawnga zirtirna thehdarh niin, a ni hnihna(October ni 3) ah Aurinna leh local media hmang tangkaiin bawlhhlawh thliar hran pawimawhzia inzirtirna, plastic hmannawn theihloh (single use plastic) thatloh zia inzirtirna leh vantlang inthiarna vawngfai tura inzirtirna beihpui thlak a ni. A ni thumna (October ni 5) ah mahni in leh a vel tihfaina hun hman a ni.

A ni lina (October ni 6) ah khawchhung leh vengchhung tihfai hnatlang neih niin, No Tolerance Day for open waste disposal / spitting hman niin a hmun ni lova bawlhhlawh paih leh khawlaia chilchhakte dan anga hren an ni a, No Tolerance Day for open waste disposal / spitting ah hian senior Sanitation Office staff te leh UD&PA Directorate staff te pawl 9 ah inthenin Kulikawn leh Bawngkawn inkarah an duty a, chawhma dar 10:00 atanga tlai dar 4 :00 thleng duty in, bawlhhlawhn paihna hmun nil ova paih, vantlang hmuna zung leh chilchhakte chu Solid Waste management Bye laws, 2021 in phalna a pek angin Rs. 100 – 300 chawitir an ni a. Bawlhhlawh a hmun lova paih mi 16 man niin Rs. 1930 chawitir an ni a, vantlang hmuna chilchhak mi 3 man niin Rs. 300 chawitir an ni bawk.

Faina Hapta ni ngana (October ni 6) hian sawrkar pisa hmunhma, sumdawnna hmun leh sdakhaw biakna hmun tihfai a ni a, faina hapta kharna October ni 8, 2021 ah neih tur niin Aizawlah chuan Aizawl Municipal Corporation kaihhruaiin he hun hi hman tur a ni a, mimal leh pawl angin emaw faina kawnga an hmalakna chi hrang hrangte anmahni social media handles hrang hrang – facebook, twitter, instagram, whatsapp etc., ah ‘Swachh Bharat Urban-Mizoram tag in mass upload drive neih a ni dawn a ni.

Faina Hapta chhungah hian Photography leh Mobile Video Clip Making Competiton buatsaih a ni a, chanchinbu zingah faina hapta hman dan puangzar tha ber “Best Newspaper for Coverage on Cleanliness/Sanitation” thlan tur niin lawmman pakhatna atanga pathumna thleng siam a ni.

Mihring nuai 7 vel inelna tur Mizoram Khawpui Fai Intihsiakna “Mizoram Cleanliness Competition, 2021” atan Mizorama khawpui hrang hrang 28-te chu category hrang hrang 3 – Aizawl City ward-Wise, District Headquarters leh Other Urban Towns ah then an ni a. Heng category hrang hrangah hian faina kawng titha lawmman pakhatna atanga pathumna dawng tur thlan a ni ang a, heng bakah hian Special Awards “Best Local Councils” leh “Best Village Councils” pakhatna atanga pathumna thleng buatsaih a ni bawk ang.

Faina hapta pual hian Waste Art Exhibition khawpui hrangb hrangah tluang taka neih a ni bawk a, sawrkar laipuia Ministry of Housing and Urban Affairs duhdan angin ,pawimawh leh khawtlanga mi langsar ten sanitation workers 600 chuang hnenah chawimawina “Scroll of Honour” an hlan a, hetih rual hian Source Segregation 100% a kalpui tura intiamna an nei bawk a ni.

ODF+ a Mizoram khaw hrang hrangte puang tur nasa lehzuala tan lak a nih theihnan Mizorama Village Council leh Local Council zawng zawng tan SBM Local Ambassador mi 241 ruat an ni a, anni hi faina lama hmalaknaah sulsutu ‘Frontliner’ an ni dawn a ni.